Տիկին Սարգսյան, դուք նախկինում, եթե չեմ սխալվում, նշանակվել եք Սերժ Սարգսյանի կողմից։ Հիմա ուզում եմ մի մեջբերում անել ձեր գրառումներից մեկից։ Ասում եք՝ «Բա, ոչխար ժողովուրդ, դուք մերժեցիք Սերժին ու բերեցիք Նիկոլին, բա հիմա չե՞ք երազում Սերժի Հայաստանը»։ Այս մասին այսօր ԱԺ-ում ասաց ՔՊ-ական պատգամավոր Վահագն Ալեքսանյանը՝ դիմելով ՀՀ մրցակցության պաշտպանության հանձնաժողովի անդամի թեկնածու Անահիտ Սարգսյանին։
«Չգիտեմ, ճիշտն ասած Սերժի Հայաստանում պաշտոնի ոնց էին նշանակվում, ուղղակի ուզում եմ հարցնել՝ ՀՀ ժողովրդին ոչխար համարելը պարտադիր պայմա՞ն էր Սերժ Սարգսյանի կողմից պաշտոնի նշանակվելու համար, թե ոչ։ Ու երկրորդ՝ երբ ասում եք 2017 թվականին ոչ մի մենաշնորհ չի եղել, արդյո՞ք էդ ձեր պատասխանը պայմանավորված է նրանով, որ դուք շարունակում եք կարծել, որ ՀՀ ժողովուրդը ոչխար է ու լավ չի հասկանում, թե դուք ինչ եք ասում։ Եթե ՀՀ ժողովրդին համարում եք ոչխար, ո՞նց եք էդ ժողովրդի ընտրած ԱԺ-ից եկել քվե ուզում, ու ոնց եք պատկերացնում, որ դուք էդ ժողովրդի մեջ ինչ-որ ղեկավար պաշտոն պետք է զբաղեցնեք երբևէ»,-ասաց Ալեքսանյանը։
Սարգսյանն արձագանքեց, որ ամբիոնի մոտ կանգնած է որպես ՀՀ քաղաքացի և մասնագետ և ոչ միայն քաղաքական հարցերի պատասխանելու.
«Սակայն ես ունեմ իմ կարծիքը տեղի ունեցող իրավիճակի մասին։ Ես չեմ կարծում, որ իմ ֆեյսբուքում նման գրառում կա։ Երբ տեսնում եմ, որ Արցախը կորցնում ենք, էդ դեպքում ես կարող եմ խնդիրներ ունենալ էն ժողովրդի հետ, որը հանգեցրեց դրան»։
«Չէ, դուք չեք կարող խնդիր ունենալ ՀՀ ժողովրդի հետ և գալ ԱԺ, որը ձևավորվում է ժողովրդի քվեարկությամբ, չի կարող մեկը ՀՀ ժողովրդին ոչխար անվանել ու գալ ՀՀ ժողովրդի ուղիղ քվեով ձևավորված մարմին ու հույս ունենալ, որ կընտրվի որևէ պաշտոնում»,-ասաց Ալեքսանյանը։
Մանրամասները՝ տեսանյութում