Արցախ ասելու համար Փաշինյանի խոսնակը ներողություն խնդրեց
Այսօր, ինչպես և նախորդ օրերին Կառավարությունը ներկայացնում է՝ ինչ վիճակ է Հակարի կամրջի մոտ, քանի բռնի տեղահանված արցախցի է արդեն Արցախից Հայաստան հասել և քանիսին է պետությունը կացարանով ապահովել։
Քիչ առաջ, երբ ներկայացվում էին վերջին թվային տվյալները, Փաշինյանի խոսնակ Նազելի Բաղդասարյանն Արցախ բառն ասաց, ապա ինքն իրեն շտկեց՝ ասելով` ներեցեք, Լեռնային Ղարաբաղ։
«Անդրադառնալով այսօրվա մեր նախորդ եթերի արծարծած հարցերին՝ ինչպես գիտեք՝ նախօրեին վարչապետը ներկայացրել էր, որ Արցախից... կներեք, Լեռնային Ղարաբաղից բռնի տեղահանված անձանց առաջարկվում է միանվագ 100 հազար դրամ գումար»,- նշեց նա։
Փաստորեն, Արցախ ասելն արդեն այս Կառավարության համար անթույլատրելի է, ուստի պետք է ներողություն խնդրել։ Հաջորդ «կներեքը», թերևս, Ստեփանակերտին Խանքենդի չասելու համար կլինի։
Նարե Գնունի
