Հաղորդում եմ ներկայացնելու հանցագործության մասին. որդուս, նրա ընկերներին Ներքին Հանդի 101 դիրքում հրամանատարները, սպաները սեպտեմբերի 14-ին թողել են ադրբեջանական շրջափակման մեջ, որդիս ու նրա մի քանի ընկերները զոհվել են։ Այս մասին MediaHub.am-ի հետ զրույցում ասաց զոհված ժամկետային զինծառայող Վահե Կարապետյանի հայրը՝ Ստեփան Կարապետյանը։
«Իմ տղան երկու ամիս տասներեք օրվա ծառայող է եղել, ի՞նչ իրավունքով էին ռազմական գործողության տարել։ Մահից րոպեներ առաջ եմ հետը խոսել, ասում էր՝ հրամնատար, սպա չկա։ Օգնություն էր խնդրում, խնդրում էր զորամաս զանգել։ Անզորությունից չգիտեի ինչ անել, 6-7 հոգով էին մնացել շրջափակված վիճակում։ Տղաներն արել են այն, ինչ կարողացել են, ոչ ոք չի եղել, որ իմ երկու ամիս ծառայած տղային մարտական խնդիր տա, ուղղություն ցույց տա։ Ի՞նչ կարող էր անել երկու ամսվա ծառայողը թշնամու հատուկ ջոկատների դեմ։ Փամփուշտ էլ մոտներն էլ չկար։ Իբր ասել էին տանում են ինժեներական աշխատանքներ կատարելու ու մենակ են թողել»,-ասաց նա։
Ստեփան Կարապետյանը նշեց, որ բջջային օպերատորից վերցրել են զանգերի քաղվածքը.
«Որդիս աֆիցերին է զանգել, չգիտեմ՝ ինչ են խոսել։ Պահանջելու եմ՝ վերծանեն։ Ինչպե՞ս կարող էին նորակոչիկին անծանոթ տեղանքում ռազմական գործողության մեջ թողնել։ Չգիտենք իրենց խմբից ողջ մնացած տղա կա թե ոչ»,-ասաց նա։
Ստեփան Կարապետյանի խոսքով՝ որդու մարմինը հողին են հանձնել սեպտեմբերի 29-ին.
«Գիտեմ, որ մտերիմ ընկերն էլ է մահացել, բայց մարմինը շրջափակման մեջ է դեռ։ Չգիտենք՝ քանիսն են զոհվել»,-ասաց նա։
Անի Գևորգյան