Բժիշկները եւ հետազոտողները կոչ են անում Նյու Մեքսկիոյի օրենսդիրներին թույլ տալ հալյուցինածին սնկերի օգտագործումը հոգեբուժական թերապիայում՝ ուղղված դեպրեսիայի, տագնապի, հոգեբանական տրավմաների եւ ալկոհոլիզմի հաղթահարմանը, գրել է Medical Xpress-ը։ https://medicalxpress.com/

Երեքշաբթի օրենսդրական հանձնաժողովը լսել է կողմնակիցներին, որոնք հույս ունեն ընդլայնել պսիլոցիբինի՝ փսիխոդելիկ ակտիվ բաղադրիչի կիրառման ոլորտը, որը պարունակվում է որոշ սնկերում, բուժման եւ հետազոտությունների համար։

Օրեգոնը առայժմ միակ նահանգն է, որտեղ լեգալացվել է պսիլոցիբինի թերապեւտիկ օգտագործումը։

Վերջին հետազոտությունները ցույց են տալիս, որ պսիլոցիբինը կարող է օգտակար լինել խոր դեպրեսիայի բուժման ժամանակ, ներառյալ անբուժելի հիվանդ պացիենտների հոգեկան տառապանքները, ինչպես նաեւ փսիխոակտիվ նյութերի չարաշահման դեպքում, ներառյալ ալկոհոլիզմը, բժշկի հսկողության ներքո, փոքր չափաբաժնով։

Բժիշկ Լոուրենս Լիմանը (Նյու Մեքսիկոյի համալսարանի պրոֆեսոր) օրենսդիրներին հորդորել է առաջ շարժվել՝ չսպասելով դաշնային ապաքրեականացմանը կամ կարգավորող մարմինների հավանությանը, որպեսզի ընդլայնվի պատասխանատու թերապիան պսիլոցիբինի չափաբաժինների օգտագործմամբ։

Լիմանը եւ հարցի մյուս կողմնակիցները նշել են պսիլոցիբինով բուժման նոր մեթոդների մասին, որոնք նախատեսում են վեցժամյա սեանսներ՝ բժշկի հսկողությամբ, եւ լայն քննարկում հետագա խորհրդատվությունների համար։ Նա նախազգուշացրել է օրենսդիրներին, որ հանրային հետաքրքրությունը ծնում է անօրինական, ընդհատակյա փորձարկումներ՝ առանց երաշխիքների։

Հալյուցինածին սնկերի ուսումնասիրությունը թերապիայի համար լայն տարածում է ստացել այն նահանգներում, որոնք գլխավորում են ինչպես դեմոկրատները, այնպես էլ հանրապետականները, ներառյալ Հավայները, Քոնեկտիկուտը, Տեխասը, Յութան եւ Օքլահոման։ Իսկ պսիլոցիբինը ապաքրեականացվել է Վաշինգտոն եւ Դենվեր քաղաքներում, ինչպես նաեւ Ան Արբորում (Միչիգանի նահանգ), Քեմբրիջում (Մասաչուսեթսի նահանգ), Օքլենդում եւ Սանտա Քրուզում (Կալիֆոռնիայի նահանգ)։

Որոշ նահանգներում զինվորական վետերանները օգնում են համոզել օրենսդիրներին, որպեսզի ուսումնասիրեն հալյուցինածին սնկերը՝ դրանց թերապեւտիկ օգտագործման նպատակով։

Ներկայում Նյու Մեքսիկոյում պսիլոցիբինի օգտագործմամբ թերապիան օրինական կարող է համարվել կլինիկական փորձարկումների միջոցով։

Դասական փսիխոդելիկներ են կիսասինթետիկ փսիխոակտիվ նյութերը, մեսկալինը, պսիլոցիբինը եւ այախուասկան։ Բուսական ծագում ունեցող հալյուցինածինները վաղուց արդեն օգտագործվում են բնիկ ժողովուրդների կողմից ամբողջ աշխարհում։