Եվ այսպես, ժամը 22.00-ի դրությամբ Արցախի նախագահը Անվտանգության խորհրդի նիստ չի հրավիրել:
Տասը ժամից ավելի է, ինչ Արցախը ՀՀ և աշխարհի հետ կապող կյանքի միակ ճանապարհն շարունակում է փակ մնալ: Ավելին՝ ադրբեջանցիները նաև հոգեբանական տեռորի են դիմել՝ դեպքի վայրում վեր են ծածանում Ադրբեջանի ու Թուրքիայի դրոշները, երգում, սադրում հնարավոր բոլոր միջոցներով:
Իսկ ի՞նչ է անում Արցախի իշխանության ղեկին գամված անձը. ճիշտ է՝ ոչինչ: Կրկնենք՝ ժամը 22.00-ն է, բայց Արցախի նախագահ Արայիկ Հարությունյանն Անվտանգության խորհրդի նիստ չի հրավիրել: Իսկ ինչո՞ւ, չի՞ կարևորում կատարվածը, դրա մեջ վտանգներ չի՞ տեսնում:
Եթե հավատանք նրա ֆեյսբուքյան էջին ու դրանում հրապարակված հայտարարության սրտաճմլիկ տեքստին՝ մտահոգ էլ է, վտանգներ էլ է տեսնում, անգամ դիմել է այս կապակցությամբ աշխարհին, «քանի որ ադրբեջանական կողմի գործողությունները կոպտորեն խախտում են միջազգային իրավունքի հանրահայտ նորմերը, և Ադրբեջանը ձգտում է Արցախի բնակչության էթնիկ զտման ու հայրենազրկման»: Այս սրտաճմլիկ բառակույտը հրապարակվել է նրա էջում ինը ժամ առաջ, և վերջ:
Ի դեպ, սրանից զատ, վերջին պաշտոնական տեղեկատվությունը Արցախի նախագահի մասին հրապարակվել է երկու օր առաջ: Դրանից մենք տեղեկանում ենք, որ Մարսելում նա հանդիպումներ է ունեցել, որոնց մասնակցել է նաև Մարսել քաղաքում ՀՀ գլխավոր հյուպատոս, բարերար Վարդան Սիրմաքեշը: Վերջինս, ի դեպ, Արայիկ Հարությունյանի ոչ միայն մտերիմ ընկերն է, այլև բիզնես-գործընկերը՝ տարիներ շարունակ:
Արցախի նախագահը Անվտանգության նիստ չի հրավիրում, որովհետև, ինչպես ավելի վաղ MediaHub-ը գրել էր, Արցախում չէ: Այո, Արայիկ Հարությունյանը պատերազմից հետո ու հատկապես վերջին ամիսներին, երբ Արցախը հանձնել է ռուս խաղաղապահներին, գրեթե Ստեփանակերտում չի լինում: Ի դեպ, մի քանի ժամ առաջ այս հարցը պարզաբանելու համար MediaHub-ը դիմել էր հումանիտար աղետի շեմին հայտնված Արցախի նախագահի խոսնակին, որն այդպես էլ հստակ պատասխան մեզ չտվեց՝ ուր է նրա ղեկավարը:
Ստացվում է, որ Արցախի ճակատագիրը չի հետաքրքրում ո՛չ ՀՀ իշխանություններին, ո՛չ էլ հենց Արցախի նախագահին... Այդ դեպքում էլ ի՞նչ սպասենք ու պահանջենք այսպես կոչված միջազգային հանրությունից, որը երկու տարի առաջ էլ, այսօր էլ ո՛չ տեսնում է, ո՛չ լսում է և ո՛չ էլ խոսում է: