ԿԳՄՍ նախարարի անակնկալ պաշտոնանկությունից հետո մամուլը գրում է, որ այս պաշտոնում հավանական թեկնածուներից է «Իմ քայլը» բարեգործական հիմնադրամի գործադիր տնօրեն Մխիթար Հայրապետյանը: 

Տեղեկությունը ճշտելու համար Հայրապետյանի հետ կապ հաստատել չստացվեց։ Փոխարենը «Իմ քայլը» հիմնադրամի աշխատակազմի ղեկավար Դավիթ Մկրտչյանը MediaHub-ի հետ զրույցում ասաց, որ հենց այս պահին Հայրապետյանը աշխատանքային հանդիպման է հիմնադրամի ծրագրերի հետ կապված։ 

Մկրտչյանը շեշտեց, որ որեւէ քննարկում կամ խոսակցություն չկա առ այն, որ Հայրապետյանը կթողնի հիմնադրամի տնօրենի պաշտոնը։ 

«Նման քննարկում չկա։ Պարոն Հայրապետյանը հիմնադրամի մետ աշխատանքային պայմանագիր ունի, որը կնքվել է անցած տարվա սեպտեմբերին, և  սա նշանակում է, որ այն դեռ մեկ տարի ուժի մեջ է։ Պայմանագիրը կնքվել է 2 տարով»,-ասաց Մկրտչյանը։ 

Հիշեցնենք, որ ըստ MediaHub-ի աղբյւորների՝ ԿԳՄՍ նախարարի ամենահավանական թեկնածուն այս պահին Ժաննա Անդրեասյանն է, որը ներկայումս փոխնախարարի պաշտոնն է զբաղեցնում:

Հիշեցնենք նաև, որ Հայրապետյանը մինչեւ հիմնադրամի տնօրեն դառնալը զբաղեցնում էր Հայաստանի սփյուռքի նախարարի պաշտոնը, իսկ մինչ այդ՝ Հայաստանի Ազգային ժողովի 7-րդ գումարման պատգամավոր էր «Իմ քայլը» դաշինքից։ Պատգամավորական ժամանակաշրջանում նա զբաղեցնում էր Կրթության, գիտության, մշակույթի եւ սպորտի մշտական հարցերի հանձնաժողովի նախագահի պաշտոնը։ 

Լիա Սարգսյան