Մեքսիկայում աշխատողները եկեղեցում վերանորոգման աշխատանքներ կատարելիս ացտեկների աստծուն պատկերող որմնանկար են հայտնաբերել: Շենքի հիմնական կառույցը վերանորոգելու համար վարձված վերականգնողների խումբն ապշել է, երբ Մեքսիկայի Տեպոզլան քաղաքի կաթոլիկ եկեղեցում սրբի նախաիսպանական պատկերագրություն է նկատել:
Մեքսիկայի մշակույթի նախարարության եւ Մարդաբանության ու պատմության ազգային ինստիտուտի մամուլի հաղորդագրության համաձայն՝ Քրիստոսի Սուրբ Ծննդյան նախկին վանքը Տեպոզլանում կառուցվել է 16-րդ դարում՝ որպես տարածաշրջանում կառուցված առաջին կաթոլիկ վանքի մաս։ 2017-ի երկրաշարժից հետո հին վանքի վերանորոգման աշխատանքներ են սկսվել։ Ըստ հնագետների՝ երեք բացօթյա մատուռների պատերի ներկի շերտերի տակ հնագետները նկատել են կարմիր շրջանի մի մասը։ Նրանք ակնկալել են, որ եթե ներկը հանեն, Մարիամ Աստվածածնի կամ կամ Հիսուս Քրիստոսի նկարը կերեւա: Բայց նրանք սխալվել են։
Որմնանկարը մոտ մեկ մետր տրամագծով կարմիր շրջան է։ Շրջանի ներսում կան մի քանի նախակոլումբիական պատկերներ, այդ թվում՝ կացին, չիմալի կամ վահան, ծաղիկների մի ճյուղ եւ փետրավոր գլխարկ կամ «պենաչո», որը ավանդաբար կրել են ացտեկ արիստոկրատները:
Փետուրների եւ այլ օրգանական նյութերի փխրունության պատճառով շատ քիչ պենաչոներ են հայտնաբերվել։ Քիչ են նաեւ պատի նկարները։ Վիեննայի Welt Museum ազգագրական թանգարանում ներկայումս պահվում է իրական գլխարկի ամենահայտնի օրինակը՝ Մոնթեսումայի գլխարկը: Հարկ է նշել, որ 2021 թվականին թանգարանը մերժել է Մեքսիկայում ցուցադրության համար իրը տրամադրելու խնդրանքը։
Հնագետներն ասում են, որ պատկերը Տեպոզլանի ներկայիս բնակչությանը կապում է իրենց նախնիների հետ: Բացի այդ, նրանց զեկույցում ասվում էր, որ նկարը վկայում է տեպոզտեկյան հասարակության վերափոխման մասին:
Տեպոզլանը գտնվում է Մեքսիկայի Մորելոս նահանգում, Մեխիկոյից հարավ, եւ մտնում է Էլ Տեպոստեկո ազգային պարկի կազմի մեջ։ Ենթադրվում է, որ այստեղ է ծնվել Քեթցալկոատլը՝ ացտեկների աստվածային փետրավոր օձը։ Ժամանակին այս վայրում բարձրացել է ացտեկների Տեպոստեկո բուրգը՝ կառուցված քաղաքի վերեւում գտնվող տպավորիչ ժայռի վրա: