ԱՄՆ-ի տրամադրած տեղեկատվությունը բավարար չէր ահաբեկչություն կանխելու համար․ Նարիշկին
Ռուսաստանի արտաքին հետախուզական ծառայության տնօրեն Սերգեյ Նարիշկինը հայտարարել է, որ Միացյալ Նահանգների Հետաքննությունների դաշնային բյուրոյի տրամադրած տեղեկատվությունը ընդհանուր է եղել ու թույլ չի տվել բացահայտել Կրոկուսում տեղի ունեցած ահաբեկչության բոլոր մասնակիցներին։
Նրա խոսքով՝ ԱՄՆ-ի եւ Ռուսաստանի միջեւ հակաահաբեկչական կապի ալիքն աշխատում է, բայց սահմանափակումներով։
«Այո, իսկապես, Անվտանգության դաշնային ծառայությունը միանշանակ տեղեկատվություն է ստացել ԱՄՆ հետախուզական ծառայություններից, որ դա, ցավոք, հնարավոր է։ Բայց, ինչպես ասացին մեր ռուս գործընկերները, տեղեկատվությունը չափազանց ընդհանրական է եղել ու թույլ չի տվել մեզ լիովին բացահայտել նրանց, ովքեր մասնակցել են այս սարսափելի հանցագործությանը», - լրագրողների համապատասխան հարցին պատասխանել է Նարիշկինը ՌԴ ԱԴԾ-ի և Բելառուսի պետական անվտանգության ծառայության խորհուրդների նիստից հետո։
ՌԴ ԱՀԾ ղեկավարի խոսքով՝ ԱՄՆ-ի և Ռուսաստանի միջև հակաահաբեկչական կապի ալիքը շարունակում է գործել, սակայն դրա ազդեցությունը սահմանափակ է։
Սերգեյ Նարիշկինն ասել է, որ ալիքի վրա ազդում է միջազգային իրավիճակը, ինչպես նաև Միացյալ Նահանգների գործողությունները, որոնք «շատ, շատ ցածր» են իջեցրել միջպետական համագործակցության մակարդակը։
Մարտի 8-ի գիշերը ամերիկյան դեսպանատունը տեղեկություն էր տարածել Ռուսաստանում նախապատրաստվող ահաբեկչության մասին։ Դրանից հետո նմանատիպ նախազգուշացում է հրապարակվել Մեծ Բրիտանիայի դեսպանատան և արտաքին գործերի նախարարության կողմից։ Մարտի 19-ին ՌԴ նախագահ Վլադիմիր Պուտինը նման նախազգուշացումները շանտաժ էր որակել։
Մարտի 22-ի երեկոյան զինված մարդիկ ներխուժել էին մերձմոսկովյան «Կրոկուս Սիթի Հոլլ» համերգասրահ։ Նրանք կրակ էին բացել կենտրոնի այցելուների վրա եւ այրել շենքը։ Ահաբեկչության զոհ է դարձել 144 մարդ, վիրավորվել՝ 551-ը։ Մարտի 26-ին ԱԴԾ տնօրեն Ալեքսանդր Բորտնիկովը հաստատել էր, որ Ռուսաստանը տեղեկություն է ստացել ահաբեկչության նախապատրաստման մասին, սակայն տեղեկությունը «ընդհանուր բնույթ է կրում»։
