Այսօր՝ ապրիլի 9-ին, Ստեփանակերտի Ս. Աստվածածին առաջնորդանիստ եկեղեցու բակում տեղի է ունեցել Սուրբ Հարության տոնին նվիրված մշակութային միջոցառում մայրաքաղաքի մանկապատանեկան ստեղծագործական կենտրոնի, Գյուրջյանի անվան արվեստի և կիրակնօրյա դպրոցների սաների մասնակցությամբ:
«Արցախպրես»-ի թղթակցի հաղորդմամբ՝ միջոցառումը կազմակերպվել է Ստեփանակերտի քաղաքապետարանի նախաձեռնությամբ:
Քաղաքապետարանի աշխատակազմի մշակույթի, երիտասարդության հարցերի և զբոսաշրջության բաժնի պետ Տաթևիկ Բալայանի խոսքով՝ նույնիսկ շրջափակումը չէր կարող խանգարել կյանքի կոչելու մշակությային այս ծրագիրը՝ նվիրված Սուրբ Հարության տոնին:
«Այս միջոցառումը երեխաների առօրյան աշխուժացնելու հնարավորություն է ընձեռում։ Մասնակիցները Սուրբ Զատկի վերաբերյալ իրենց պատկերացումներն են արտացոլել նկարչական թղթին և միջոցառման համար նախատեսված հավկիթների վրա։ Բացի այդ պատրաստվել է Զատկի ծառ՝ ներկած ձուն կախելու, զարդարելու համար։
Միջոցառման մասնակից Անին տոնական Արցախի Հանրապետության դրոշն ու աղավնի է նկարել, որն իր խոսքով պետք է խաղաղություն բերի Արցախ աշխարհին։
Նա անկեղծացավ, որ իր նկարազարդած հավկիթները Զատկի ծառից է կախել՝ հույսով, որ կիրականանա պահած երազանքը՝ կբացվի Արցախը Հայաստանին կապող Կյանքի ճանապարհը և կարողանա այցելել իր տատիկին ու պապիկին:
