Իհարկե, դրական է Հնդկաստանից զենքի հնարավոր գնումը, սրանով մենք արևմտյան զենք ձեռքբերելու դուռ ենք լայն բացում։ Մենք այս պահին զենքի սովի մեջ ենք գտնվում և՛ քանակական, և՛ որակական առմուով, ուստի այս քայլն արդեն ինքնին լավ է։ Այս մասին այսօր MediaHub.am-ի հետ զրույցում ասաց ռազմական փորձագետ Մհեր Հակոբյանը։
Հիշեցնենք, որ հնդկական ThePrint առցանց թերթը հայտնել էր, որ Ադրբեջանի հետ հարաբերություններում շարունակվող լարվածության համատեքստում Հայաստանը դիտարկում է Հնդկաստանի հետ պաշտպանական նոր գործարքներ կնքելու հնարավորությունը․ զենիթահրթիռային համալիրներից զատ, ինչպիսին է «Ակաշ»-ը («Akash»), Հայաստանը դիտարկում է անօդաչու թռչող սարքերի և այլ զինամթերքի հնարավոր գնումը։
«Մեր խնդիրն այս իրավիճակում այն է, որ մեր զենքի հիմնական մատակարարը ՌԴ-ն էր, սակայն այս պահին հենց ինքը սուր պակաս ունի ինքնասպան «կամիկաձե» դրոնների, և մենք չենք էլ կարող հույս ունենալ, որ դրանք մեզ կտրամադրի հարկ եղած դեպքում։ «Ակաշ»-ը կարող ենք համարել, որ «Բուկ» զենիթահրթիռային զինատեսակի արևմտացված տարբերակն է։ Այնպես չէ, որ սա եկավ մեր երկիրն ամբողջովին ապահով է լինելու, սակայն չեղածից լավ է»,-ասաց նա։
Փորձագետի խոսքով՝ ցանկալի կլիներ, որ օդային պաշտպանության միջոցներ ևս ձեռքբերվեին։
«Մեզ համար շատ կարևոր է հարվածային զինատեսակների ավելացումը, չարաբաստիկ «Բայրաքթարին» հավասար ոչինչ չունենք այս պահին, պետք է զենք, որ կարողանա պատասխան հարված տալ «Բայրաքթարին»․ մեզ վահանից բացի նաև սուր է պետք»,-մեկնաբանեց Հակոբյանը։
Հարցին, թե այս դեպքում քաղաքական իշխանության գործողություններն ի՞նչ ուղղությամբ պետք է ընթանան՝ ամրացնելու և իրենց նշած պորֆեսիոնալ բանակ ունենալու համար, վերջինս պատասխանեց՝ նոր կոնցեպտի կրող ղեկավար է պետք։
«Ցավոք, մեր քաղաքական դաշտում այդ նոր կոնցեպտ կրող ղեկավարին չեմ տեսնում»,-ամփոփեց նա։
Հիշեցնենք, ՀՀ Պաշտպանության նախարար Սուրեն Պապիկյանը նախօրեին մեկնել է Հնդկաստան: Նախքան այս այցը հնդկական մամուլը բազմիցս է գրել, որ Հայաստանը ցանկություն է հայտնել հնդկական արտադրության զենք-զինատեսակներ ձեռք բերել և այս ուղղությամբ բանակցություններ են վարվում:
Լիաննա Թորոսյան