ՔՊ պատգամավոր Արմեն Խաչատրյանը հաստատում է, որ ադրբեջանական զորքերը 44-օրյա պատերազմից հետո Հայաստանից 127 քառ. կմ տարածք են գրավել։

Իշխանական պատգամավոր Խաչատրյանը այս թիվը հնչեցրել էր օրերս Սանկտ Պետերբուրգում ՀԱՊԿ անդամ պետությունների խորհրդարանների խորհրդակցության ժամանակ։

Իսկ մինչ այս պաշտոնապես բոլորովին այլ թիվ էր հրապարակել։ Վարչապետ Փաշինյանը սեպտեմբերի 13-ի հարձակումից մեկ օր անց Ազգային ժողովում հայտարարել էր, թե այդ մարտերի ժամանակ Ադրբեջանը տասը քառ. կմ տարածք է գրավել Հայաստանի ինքնիշխան տարածքից:

Իսկ 2021-ին հայտարարվել էր 41 քառ. կիլոմետրի կորստի մասին։ Ստացվում է, որ 2021-ից մինչև օրս 51 քառ։ կմ տարածք է օկուպացրել Ադրբեջանը։

Ինչպես տեսնում ենք՝ իշխանության տարբեր ներկայացուցիչներ տարբեր թվեր են ներկայացնում ադրբեջանական օկուպացիայի ծավալների մասին:

Ի դեպ, պաշտպանության նախարարությունը սեպտեմբերյան մարտերից մեկ ու կես ամից անց էլ պաշտոնապես ո'չ դիրքային կորուստներն է ներկայացրել, ո'չ էլ զոհերի մասին ամփոփ տվյալները։

Ինչի՞ հետևանք են իշխանության տարբեր ներկայացուցիչների հակասական հայտարարությունները կամ գաղնապահությունն այն պարագայում, երբ խոսքը վերաբերում է զոհերի թվին և անուններին:

Շատերը կարծում են, թե գործ ունենք փնթի իշխանության անպատասխանատվության հետ, մանավանդ, որ հասարակությունն առանձնապես պահանջատիրական դիրքերից հանդես չի գալիս:

Մյուս կողմից, ակնհայտ է նաև, որ Փաշինյանի թիմը նույնիսկ անվտանգային հարցերը ծառայեցնում է իր ներքաղաքական օրակարգին, այլ խոսքով՝ իշխանության պահմանմանը: Ըստ այդ, սահմանային վիճակի կամ զոհերի մասին տեղեկատվությունը հարմարեցվում է, այսպես ասած, ներքաղաքական «կուրսին»:

Սա, ի դեպ, ամենաարժանահավատ վարկածն է:

Վահրամ Բագրատյան