Վերջերս էլեկտրական մեքենաների լիցքավորման կայանների միացման հետ կապված խնդիր էր առաջացել. որոշ կայանների էլեկտրաէներգիան անջատել էին։ Տարածքային կառավարման և ենթակառուցվածքների նախարար Գնել Սանոսյանն այսօր լրագրողների հետ զրույցում ասաց, որ խնդիրն արդեն կարգավորվել է, իսկ Հանրային ծառայությունները կարգավորող հանձնաժողովի նախագահ Գարեգին Բաղրամյանն էլ Mediahub-ի հետ զրույցում ասաց, որ խնդիրը կապված է հողհատկացման հետ և ՀԷՑ-ի կամ ՀԾԿՀ տիրույթում չէ։
«Բոլոր այն լիցքավորիչ կայանները, որոնք տեղադրված են սպառողների տարածքներում, օրինակ՝ սուպերմարկետն իր ավտոկանգառում ունի տեղադրած լիցքավորման համակարգեր։ Այդտեղ որևիցե խնդիր չկա, ինքն իր տարածքում ցանկացած տիպի սպառիչ, ինչպիսին նաև էլեկտրալիցքավորման կայանն է, կարող է տեղադրել։ Բայց եղել են նաև էլեկտրալիցքավորման կայաններ, որոնք տեղադրված են համայնքային հողում, խանութից ինչ-որ լար է անցկացված, դա գործող կանոնների խախտում է, որովհետև, եթե ինքը առանձին սպառիչ է, ապա համապատասխան միացման կարգ կա։ Եվ ինքը պետք է հաշվառման համակարգ ունենա, այսինքն՝ ցանկացած խանութ, եթե ուզում է նման գործունեություն ծավալել, առաջին հերթին պետք է լուծի հողհատկացման հարցերը։ Որևիցե ուրիշ խնդիր չկա»,- MediaHub-ին ասաց Բաղրամյանը։
Մանրամասն՝ տեսանյութում
Վահե Մակարյան