Լոս Անջելեսի քաղաքային խորհրդի անդամ Բոբ Բլյումենֆիլդը Twitter-ի իր էջում Սումգայիթում հայերի ջարդերի 35-րդ տարելիցի կապակցությամբ գրառում է կատարել՝ իր աջակցությունը հայտնելով Ադրբեջանի կողմից շրջափակված Արցախի բնակչությանը։

«Սումգայիթում հայերի ջարդերի 35-րդ տարելիցին ընդառաջ՝ եկեք հարգենք զոհերի հիշատակը և ապահովենք, որ «Այլևս երբեք»-ն իրականություն դառնա՝ Ադրբեջանին թույլ չտալով ոչնչացնել Արցախի/Լեռնային Ղարաբաղի 120.000 հայերին»,- գրել է նա։

Հիշեցնենք` 1988 թվականի փետրվարի 27-29-ը Ադրբեջանի Սումգայիթ քաղաքում պետական մակարդակով կազմակերպված ջարդերի հետեւանքով զոհվեց ԽՍՀՄ պաշտոնական տվյալներով՝ մի քանի տասնյակ, իսկ ոչ պաշտոնական տվյալներով հազարից ավելի հայ: