Մեր խնդիրը ոստիկանության ինստիտուտի հետ չէ, դեմ չէ, մեր խնդիրը ոստիկանության համակարգում տեղ գտած բռնություններ իրականացնող անձանց հետ է, որոնք, բնականաբար, մոռանալով իրենց համազգեստի պատիվը՝ փորձում են քաղաքացու նկատմամբ բռնություն կիրառել։ Ցավոք, թիրախում հայտնվեցին նաև մեր փաստաբանները։ Այս մասին այսօր լրագրողների հետ զրույցում ասաց Փաստաբանների պալատի նախկին նախագահ Արա Զոհրաբյանը՝ խոսելով փաստաբանների եռօրյա գործադուլի մասին։
«Մենք ոստիկանապետի հրաժարականն ենք պահանջում: Բնականաբար, մենք հասկանում ենք, որ մեր պահանջելով չի, որ այդ անձը հրաժարական կտա, բայց բոլոր դեպքերում մենք պահանջելու ենք հրաժարականը․ ինչո՞ւ, որովհետև այդ դեպքերը տեղի են ունեցել Արամ Հովհաննիսյանի պաշտոնավարման օրոք։ Եթե այդ ոստիկանապետը պատշաճ արձագանքեր և փորձեր այդ բռնությանը ներգրավված ոստիկանների նկատմամբ իրավական գործընթաց կիրառել, մենք իրեն չէինք թիրախավորի, բայց քանի որ վերջին դեպքում դա չեղավ, մենք հատուկ իրեն թիրախավորել ենք»,-ասաց նա։
Զոհրաբյանը նշեց, որ ուրախ է՝ գործը ԱԱԾ է տեղափոխվվել և ԱԱԾ-ն գործը օբյեկտիվ է քննում։
MediaHub-ի հարցին, թե պետական մարմիններին կամ քաղաքական ղեկավարությանը փաստաբանական ծառայություն մատուցող փաստաբանները մասնակցո՞ւմ են այս ակցիային, վերջինս պատասխանեց․
«Նման վիճակագրություն չունենք, բայց հիշեցնեմ, որ յուրաքանչյուր փաստաբան անկախ անձ է և կախված չէ Փաստաբանների պալատից։ Յուրաքանչյուր փաստաբան ինքն է որոշում այս պայքարն իրենն է համարում, թե ոչ: Եթե չի համարում, ինքը գիտի»,-ասաց Զոհրաբյանը։
Մանրամասները՝ տեսանյութում