Յուրօրինակ մեթոդներ ենք մշակելու, միջոցներ ենք ձեռնարկելու՝ պայքարելու այն անիրավության դեմ, ինչին ականատես ենք լինում։ Այս մասին այսօր լրագրողների հետ զրույցում ասաց փաստաբան Գոռ Գևորգյանը՝ խոսելով փաստաբանների եռօրյա ակցիայի մասին։
«Նախորդ անգամ մեկօրյա գործադուլը նախազգուշացում էր, պահանջեցինք այն, ինչին պետք է արձագանքեին իրավապահ մարմինները. երկնքից աստղեր չէինք ուզում, ուզում էինք իրավական վարքագծի դրսևորում տեսնեինք պետական մարմիններից, բայց նրանք ջանասիրաբար խախտում են մարդկանց իրավունքները, իսկ այդ խախտումներն իրենց կաշվի վրա զգում էին փաստաբանները։ Այս դեպքում բռնություն տեսանք փաստաբանի նկատմամբ ու իր գործունեության շրջանակներում․ մարդը մտել էր իրավական օգնություն ցուցաբերելու, ստացվեց, որ կարճ ժամանակ անց ինքը օգնության կարիք ունի ու նորից իր գործունեության շրջանակներում»,-ասաց նա։
Փաստաբանի խոսքով՝ այդ բռնությունից հետո, երբ ոչ մեկը չպատժվեց, տպավորություն էր, թե բռնություն իրականացնող ոստիկանները դեռ մի բան էլ խրախուսվում են։
Նշենք, որ տվյալ ոստիկանների լիազորություններն արդեն դադարեցված են։
Հարցին, թե լիազորությունները դադարեցնելուց հետո ինչու են փաստաբանները ՆԳՆ գնում, վերջինս պատասխանեց․
«Ոստիկանապետ Արամ Հովհաննիսյանն իրեն պասիվ է դրսևորել։ Ոստիկանապետը մինչև վերջ անդրդվելի մնաց ու այդպիսով խրապուսեց փաստաբանների դեմ բռնությունը»,-ասաց նա։
Մանրամասները՝ տեսանյութում