Ազգային ժողովի ընդդիմադիր «Հայաստան» խմբակցության «Վերածնվող Հայաստան» թևը դադարեցնում է գործունեությունն Ազգային ժողովում։
Ընդգծելով, որ խորհրդարանական գործունեությունն ու պատգամավորական մանդատներն իրենց համար ինքնանպատակ չեն՝ կուսակցությունը հայտարարում է՝ «բոլոր այն հիմքերը, որոնք ստիպում էին բոյկոտել ԱԺ նիստերն ամիսներ առաջ, շարունակում են արդիական մնալ նաև այսօր»։
Ըստ հաղորդագրության՝ կուսակցության անդամ չորս պատգամավորներից երեքը՝ կուսակցության նախագահ Վահե Հակոբյանը, փոխնախագահներ Հռիփսիմե Ստամբուլյանն ու Ելենա Կիրակոսյանը մանդատներից հրաժարվելու դիմում են ներկայացրել, Զեմֆիրա Միրզոևան, որ խորհրդարան է անցել ազգային փոքրամասնությունների համար նախատեսված քվոտայով, կշարունակի պատգավորական գործունեությունը՝ սեփական դիմումի համաձայն՝ ժամանակավորապես սառեցնելով կուսակցությանն իր անդամությունը։
Չնայած ակնհայտ թույլ կուսակցություն լինելով՝ «Վերածնվող Հայաստանը» «Հայաստան» դաշինք կազմած երկու քաղաքական ուժերից մեկն էր: Հիմա այս ուժը դադարեցնում է իր մասնակցությունը ԱԺ-ին: Փաստացի «Հայաստան» դաշինքն այլևս գոյություն չունի, ինչպես դադարել է լինելուց «Պատիվ ունեմ» դաշինքը, երբ այն լքեց «Հայրենիք» կուսակցությունը: Քաղաքական լեգիտիմության առումով՝ խորհրդարանը հայտնվում է լուսանցքում, ինչից մինչև ինստիտուցիոնալ ճգնաժամ՝ կես քայլ է...
Ինչո՞ւ, ըստ էության, պառակտվեցին երկու ընդդիմադիր խորհրդարանական խմբակցությունները:
Պատճառներն ակնհայտ ու կանխատեսելի էին:
«Հայաստան» և «Պատիվ ունեմ» դաշինքներն, ըստ էության, իրավիճակային էին ու ստեղծվել էին 2021թ-ի ԱԺ արտահերթ ընտրություններին ընդառաջ՝ իշխանափոխություն իրականացնելու նպատակով:
Ընտրությունների ճանապարհով իշխանափոխություն տեղի չունեցավ, բայց ընդդիմադիր դաշինքները շարունակեցին այդ օրակարգի գեներացիան՝ մայիս- հուլիս ամիսներին փողոցային պայքարի ճանապարհով, ըստ էության, գնալով վա բանկ:
Դրա ձախողումից հետո խորհրդարանական ընդդիմության ինստիտուցիոնալ ճգնաժամն ու փոշիացումն այլևս կանխատեսելի էին, մանավանդ, որ օպոզիցիոն սեգմենտների մեծ մասն այլևս չի հավատում արագ իշխանափոխության օրակարգին, որը տարբեր ուժերի կոնսոլիդացիայի միակ հիմքն էր:
Ի՞նչ է հաջորդելու ընդդիմության ինստիտուցիոնալ ճգնաժամին:
Դասական ժողովրդավարության պայմաններում արտահերթ ընտրությունների հեռանկարը գրեթե անխուսափելի կդառնար:
Բայց Հայաստանում իրադարձությունները կգնան այլ տրամաբանությամբ: Թույլ ընդդիմության պայմաններում՝ իշխանությունը դառնալու է ավելի ավտորիտար, սանձարձակ: Դրա հետևանքն, անշուշտ, դառնալու է պետական, քաղաքական համակարգերի դեգրադացիան, որն ամիսներ անց հանգեցնելու է համապարփակ ճգնաժամի՝ անկանխատեսելի հետևանքներով:
Վահրամ Բագրատյան