Վարորդական իրավունք ստանալը ՀՀ քաղաքացու համար տևական ժամանակ դարձել է գլխացավանք։ Եթե այլ երկրներում բավարար է լավ վարել իմանալը և տեսական ու գործնական քննությունները հաջող հանձնելը, ապա Հայաստանում գործընթացը լի է բարդություններով։
MediaHub-ը հաճախ է ահազանգեր ստանում այն մասին, որ վարորդական քննությունները պատշաճ չեն իրականացվում։ Թեև օրենքով թույլատրվում է գործնական քննության ընթացքում երկու սխալ, ՆԳՆ աշխատակիցները հաճախ կտրում են թեկնածուներին անգամ մեկ աննշան վրիպման դեպքում։
Սակայն, մյուս գլխացավանքն է մոտակա օր ամրագրելը գործնական կամ տեսական քննության համար։ «Քաղաքացին քննությունից կտրվում ա, և հաջորդ քննական օրն երեքից չորս ամիս անց է։ Օրինակ՝ Երևանում դեկտեմբերին գործնական քննությունից կտրվել եմ, մոտակա օրը բերել էր ապրիլ»,- նշեց մեզ ահազանգած քաղաքացին։
Մյուս քաղաքացին ահազանգում է․ «Տեսական քննությունս Երևանում կտրվեցի, հաջորդ անգամ կարող եմ հանձնել միայն մարտի 5-ին։ Հավելյալ գումար արտահերթ քննության համար չցանկացա ծախսեմ, ստիպված պետք է սպասեմ երեք ամիս, որ հանձնեմ քննություն»։
Նշենք, որ MediaHub-ն ուսումնասիրեց բոլոր հաշվառման-քննական ստորաբաժանումները, և վարորդական վկայական ստանալու գործնական քննության մասնակցելու համար ամենամոտ օրերը փետրվարին են մի քանի ՀՔԲ-ներում, սակայն, հիմնականում մարտ-ապրիլ ամիսներին են։
Լավ լուրը՝ վարորդական իրավունք ստացող քաղաքացիների համար այն է, որ ՆԳՆ հաշվառման-քննական ստորաբաժանումները մոտակա դեկտեմբեր ամսվա շաբաթ օրերին նաև կաշխատեն։
«Քաղաքացիներին առավել հասանելի ծառայություն տրամադրելու, ծանրաբեռնվածությունը թոթափելու և հերթերից խուսափելու նպատակով՝ ՆԳՆ հաշվառման-քննական ստորաբաժանումները կաշխատեն նաև առաջիկա շաբաթ օրերին։ Մասնավորապես՝ դեկտեմբերի 13-ին և 20-ին Երևանի և մարզերի հաշվառման-քննական ստորաբաժանումների համար սահմանվել են աշխատանքային օրեր՝ ժամը 9.00-ից մինչև 18.00-ն ներառյալ»,- նշեց ՆԳՆ մամուլի քարտուղար Նարեկ Սարգսյանը:
MediaHub-ի հարցին, թե արդյո՞ք հնարավոր է հերթերի ծանրաբեռնվածությունից ելնելով մյուս ամիսներին ևս շաբաթ օրերին աշխատեն ՀՔԲ-ները, Սարգսյանը պատասխանեց․ «Այո, անհրաժեշտության դեպքում մյուս տարի, հնարավոր է, այս նախաձեռնությունը շարունակվի»։
Մարիաննա Արամյան