Թուզը, կամ թզենու պտուղը, որը մարդկությանը հայտնի է հնագույն ժամանակներից, դարեր շարունակ գնահատվել է ոչ միայն իր համի, այլև բուժիչ հատկությունների համար: Եվ ժամանակակից գիտությունը հաստատում է. թուզը ոչ միայն նրբահամ ուտեստ է, այլև առողջության համար օգտակար նյութերի պահեստ:

Պահպանում է սրտի և անոթների առողջությունը
Թուզը հարուստ է կալիումով՝ հանքանյութ, որը օգնում է կարգավորել արյան ճնշումը և պաշտպանում է սիրտը գերծանրաբեռնվածությունից: Կալիումի անբավարար ընդունումը, հատկապես սննդի մեջ աղի ավելցուկի դեպքում, կարող է հանգեցնել հիպերտոնիայի, բայց թզի կանոնավոր օգտագործումը օգնում է վերականգնել այս հավասարակշռությունը:

Բարելավում է մարսողությունը
Թուզը պարունակում է մեծ քանակությամբ սննդային մանրաթել, որը նրբորեն խթանում է աղիների աշխատանքը, կանխում փորկապությունը և նպաստում օգտակար աղիքային միկրոֆլորայի զարգացմանը: Օրական ընդամենը երեք միրգը կարող է զգալիորեն բարելավել ստամոքս-աղիքային համակարգի աշխատանքը, կարգավորել մարսողությունը և կղանքը։

Օգտակար է հղի կանանց համար
Թուզը հարուստ է երկաթով, ֆոլաթթվով, կալիումով և B վիտամիններով, որոնք կարևոր են հղի կնոջ առողջության և երեխայի զարգացման համար: Կարևոր է հիշել, որ թուզը, հատկապես չորացրածը, պարունակում է շատ շաքար, ուստի այն պետք է օգտագործել չափավոր քանակությամբ։

Էներգիայի և սննդանյութերի արժեքավոր աղբյուր
Թուզը հարուստ է ածխաջրերով և մանրաթելերով, ինչը այն դարձնում է հիանալի նախուտեստ, որը երկար ժամանակ կշտացնում է: Թուզի կալորիաները «դատարկ» չեն. ածխաջրերից բացի, դրա պտուղները պարունակում են բազմաթիվ վիտամիններ և հանքանյութեր:

Նորմալացնում է արյան մեջ շաքարի մակարդակը
Թզի մեջ մանրաթելի բարձր պարունակությունը դանդաղեցնում է շաքարի ներթափանցումը արյան մեջ, ինչը նշանակում է, որ թարմ թուզը կարելի է ուտել առանց վախենալու, որ արյան մեջ գլյուկոզի մակարդակը կտրուկ կբարձրանա, և դրա հետ մեկտեղ՝ նաև ինսուլինը։ Չորացրած թուզը պարունակում է շատ ավելի շատ շաքար, քան թարմը, բայց չափավոր օգտագործման դեպքում այն որևէ վնաս չի պատճառի։

Որոշ ուսումնասիրություններ ցույց են տալիս, որ թզի տերևներից թեյը կամ քաղվածքները կարող են նվազեցնել ինսուլինի անհրաժեշտությունը շաքարախտով տառապող մարդկանց մոտ։

Պահպանում է երիտասարդությունը և առողջ մաշկը
Թուզը հարուստ է հակաօքսիդանտներով, այդ թվում՝ ֆենոլաթթուներով և ֆլավոնոիդներով, որոնք օգնում են պաշտպանել բջիջները ազատ ռադիկալների վնասումից և այդպիսով հակազդել ծերացման գործընթացին։ Հակաօքսիդանտները հանդիպում են թե՛ թարմ, թե՛ չորացրած թզի մեջ, և դրանց կոնցենտրացիան նույնիսկ ավելի բարձր է չորացրած մրգերում։