Այսօր՝ հուլիսի 21-ին, արտակարգ դեպք է տեղի ունեցել Շիրակի մարզում։ Ժամը 09։20-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Գառնառիճ գյուղ տանող ճանապարհին գտնվող միակ կամուրջը մասամբ փլուզվել է, ինչի հետևանքով ավտոմեքենան ընկել է փոսը։
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել է Ամասիայի հրշեջ-փրկարարական ջոկատից՝ 1 մարտական հաշվարկ։
Պարեկները սահմանազատել են տարածքը և դադարեցրել երթևեկությունը։
Տեղում պարզվել է, որ Գառնառիճ գյուղ տանող ավտոճանապարհին գտնվող կամուրջը, որով գյուղը կապվում է արտաքին աշխարհի հետ, դեռևս չբացահայտված հանգամանքներում մասամբ փլուզվել է ինչի հետևանքով «Ford» մակնիշի բեռնատարը արգելափակվել է փլուզված հատվածում, որը քաղաքացիների օգնությամբ դուրս է բերվել, սակայն կամուրջը բեռնատարների համար դարձել է անանցանելի։
Ֆոտոլրագրողը հայտնում է, որ կարճ ժամանակում դեպքի վայր ժամանած «Աշոցքի ավտոճանապարհի և ճանապարհաշինարարական» ՓԲԸ-ի աշխատակիցները՝ տնօրեն Մարսել Կարապետյանի գլխավորությամբ, իրականացրեցին ժամանակավորապես կամրջի վերանորոգման աշխատանքներ։
Հատուկ տեխնիկաներով հեռացրեցին վնասված բետոնատարի հատվածը, ինչի շնորհիվ ժամանակավորապես երթևեկությունը միակողմանի վերականգնվեց, սակայն կամուրջը հիմնովին վերակառուցման կարիք ունի։