Ֆերմերները լավ գիտեն, որ հերբիցիդներով ամբողջ դաշտը մշակելը ոչ միայն ծախսատար է, այլեւ զգալի վնաս է հասցնում շրջակա միջավայրին։ Solix գյուղատնտեսական ռոբոտը լուծում է այդ խնդիրը՝ փնտրելով մոլախոտերի կուտակման տեղերը եւ «քաղհանելով» դրանք «կետային» սրսկման մեթոդով, գրել է «Տեխկուլտը»։

Solix-ը ամերիկա-բրազիլական ընկերության ստեղծած ռոբոտն է։ Իր նախորդի՝ Solix Scout-ի նման, այն ունի չորս արեւային վահանակ։

Դաշտում տեղաշարժվելով՝ ֆերմեր ռոբոտը սքանավորում է հանդիպած յուրաքանչյուր բույս։ Հետո աշխատանքի մեջ է մտնում Alice արհեստական բանականության համակարգը, որը եզրակացություն է տալիս՝ մոլախո՞տ է դա, թե՞ ոչ։ Բոլոր մոլախոտերը ռոբոտն ավտոմատ կերպով ենթարկում է հերբիցիդով մշակման։ Solix-ը կազմում է դաշտի թվային քարտեզը՝ նշելով մոլախոտերի գտնվելու տեղն ու իրականացված մշակումը։