Մեծ Բրիտանիայի Պահպանողական կուսակցության բարձրաստիճան անդամները Բորիս Ջոնսոնին մեղադրել են ֆինանսների նախկին նախարար Ռիշի Սունակի՝ իրեն վարչապետի պաշտոնում փոխարինելու փորձերին խոչընդոտելու համար, գրել է The Guardian-ը՝ նշելով, որ ղեկավարության մրցավազքը վերածվում է դառը կռվի:
Ըստ լրատվականի՝ անցած գիշեր, երբ նախարարների եռյակը մտել է վարչապետության եւ Պահպանողական կուսակցության առաջնորդի համար պայքարի մեջ, ավագ պատգամավորներն ասել են, որ վերոնշյալ պայքարը ավելի մեծ վնաս է հասցրել կուսակցությանը, քան ավելի քան երեք տասնամյակ առաջ Մարգարետ Թետչերի տապալումը:
Կուսակցական մի պաշտոնյա Ջոնսոնին մեղադրել է անպիտան պատգամավորներին միջին եւ կրտսեր պաշտոններում նշանակելու համար՝ ասելով, որ Ջոնսոնը հեռանում է «իր իրավահաջորդի համար որքան հնարավոր է շատ անախորժություններ ստեղծելու նպատակով», ով, պաշտոնը ստանձնելուց հետո, անխուսափելիորեն պետք է աշխատանքից ազատի նրանցից շատերին:
«Այս նշանակումներն ամենավատն էին, որ ես տեսել եմ քաղաքականության մեջ: Ակնհայտ է, որ դա արվել է նրա իրավահաջորդի պաշտոնավարման առաջին շաբաթները խաթարելու նպատակով», - ասել է բարձրաստիճան աղբյուրը:
Մեկ այլ բարձրաստիճան պաշտոնյա նշել է, որ սա այն վարչակազմը չէ, որը պատրաստվում է հանգիստ հեռանալ։ Շատ զայրույթ կա եւ կնհայտ է, որ այս զայրույթի մեծ մասն այժմ ուղղված կլինի Ռիշիներին: Նա շեշտել է, որ այս ամենը շատ նման է Թրամփին:
«Ակնհայտ է, որ վարչապետը դեռ խորապես վիրավորված է կանցլերի հրաժարականից։ Ռիշիի ճամբարն առաջիկա օրերին ստիպված է լինելու մեծ զայրույթի դիմանալ։ Սա վերաբերելու է նաեւ նրան, ով կզբաղեցնի այս պաշտոնը»,- հավելել է աղբյուրը։
Միեւնույն ժամանակ, Ջոնսոնի դաշնակիցները նախազգուշացրել էին կուսակցությանը, որ շուտով կզղջան իրեն լքելու համար եւ մեղադրել թեկնածուներին, որոնք առաջադրվել են նրա փոխարեն:
Իրավահաջորդության շուրջ իրարանցման ֆոնին եւս մեկ մեղադրանք է հրապարակվել այն մասին, որ Ջոնսոնը լոբբինգ է իրականացրել մի երիտասարդ կնոջ պաշտոնի նշանակելու համար, որը պնդում է, թե իրենց միջեւ սեռական հարաբերություններ են եղել:
Այս խոսակցությունները տարածվել են անցյալ ամիս տարածված տեղեկության ֆոնին այն մասին, որ Բորիս Ջոնսոնը փորձում է իր կնոջը նշանակել իր աշխատակազմի ղեկավարի պաշտոնում, երբ ղեկավարում էր Մեծ Բրիտանիայի արտաքին հարաբերությունների գերատեսչությունը: