«Ֆիննախում թաքնվող» Նարեկ Մկրտչյանը՝ Փարաքարում կրած պարտության գլխավոր մեղավոր և պատասխանատու

Փարաքարում ՔՊ-ի պարտության գլխավոր մեղավոր ու պատասխանատու երկու անձինք՝ Տարածքային կառավարման և ենթակառուցվածքների նախարար Դավիթ Խուդաթյանն ու Աշխատանքի և սոցիալական հարցերի նախարար Նարեկ Մկրտչյանը այսօր ընդմիջմանը հանդարտ զբոսնում էին կառավարության շրջակայքում։ 

Որոշ ժամանակ անց մենք Նարեկ Մկրտչյանին տեսանք արդեն միայնակ ֆինանսների նախարարության մուտքի մոտ։ Նա այդ պահին հեռախոսով էր խոսում, որոշեցինք սպասել՝ խոսակցությունն ավարտի, նոր մի երկու հարց տանք իրենց կրած պարտության մասին։ Բայց Փարաքարում «հարց լուծող տղայի» համբավ ձեռք բերած, սակայն իրենց թիմակցի հաղթանակի հարցը չլուծած Նարեկ Մկրտչյանը, տեսնելով, որ իրեն ենք սպասում, առանց մեր կողմ նայելու ուղղակի «փախավ» մեզանից՝ մտնելով ֆիննախի շենք։ 

Իհարկե, նրա աշխատավայրը լրիվ ուրիշ տեղ էր՝ դիմացի շենքում, բայց մեր հարցերից ճողոպրելու լավագույն տարբերակն այդ պահին ֆիննախի շենքում թաքնվելն էր, եթե, իհարկե, այլ գործով չէր եկել այդտեղ։ Ամեն դեպքում, հատկապես մամուլի այսօրվա հրապարակման ֆոնին, պարոն Մկրտչյանը կարող էր տարրական քաղաքավարություն ցուցաբերել ու նախ՝ բարև տալ, հետո երկու բառով պատասխանել իրեն ուղղված հարցերին, որ տպավորություն չստեղծվեր, թե Փարաքարում անուն հանած «դուխով տղան» լրագրողներից փախչում է։ 

Հիշեցնենք, Փարաքարում «Միասնություն» դաշինքի թեկնածու Վալոդյա Գրիգորյանը 57 տոկոսից ավելի ձայնով պարտության մատնեց ՔՊ-ի թեկնածու, մի շարք քրեական պատմություններով աչքի ընկած Լյուդվիգ Գյուլնազարյանին։ MediaHub-ին ասացին՝ Նիկոլ Փաշինյանին նախապես զգուշացրել էին, որ Լյուդվիգով ընտրությունների պետք չէ մասնակցել, բայց Նարեկ Մկրտչյանը, ասում են, վստահեցրել է, որ Փարաքարն իր տարածքն է, ինքն այնտեղ լուրջ հեղինակություն ունի և որևէ խնդիր չի լինի՝ հաստատ կհաղթեն։ Բայց, պարզվեց, իր ունեցած հեղինակությունը այնքան չէր, որ ապահովեր ՔՊ-ի հաղթանակը։

Հիմա ամբողջ պատասխանատվությունը մնացել է իր ուսերին, մի քիչ էլ՝ տարածքային կառավարման նորաթուխ նախարար Դավիթ Խուդաթյանի վրա, քանի որ իր մարզն էր, և ի պաշտոնե՝ իր պատասխանատվության զոնան են մարզերն ու համայնքները։ Դրա համար էլ երկու «բախտակից-մեղավորներով» էին այսօր դուրս եկել զբոսանքի։ 

Վահե Մակարյան