Ադրբեջանը իրավունք չունի շրջափակել Արցախը, քանի որ ԱՀ-ն ունի իրացված ինքնորոշման իրավունք։ Այս մասին MediaHub-ի հետ զրույցում ասաց ՀՀ առաջին ՄԻՊ, ԱԺ նախկին պատգամավոր Լարիսա Ալավերդյանը։
«Ստեղծված իրավիճակում առաջին հերթին խախտվում է Արցախի ժողովրդի ինքնորոշման, ազատ տեղաշարժման, կրթության, բժշկական օգնություն ստանալու, ինչպես նաև աշխատանքի հիմնարար իրավունքները»,-ասաց Ալավերդյանը, ավելացնելով, որ Ադրբեջանը հակադրվում է ամբողջ միջազգային իրավունքին և արհամարհում է ցանկացած միջազգային նորմ։
Մարդու իրավունքների նախկին պաշտպանն անդրադարձավ նաև Նիկոլ Փաշինյանի հունվարի 10-ի մամուլի ասուլիսում հնչեցրած այն խոսքին, որ չկա աշխարհում երկիր, որը չի ճանաչում Արցախը Ադրբեջանի կազմում: Ալավերդյանը հռետորական հարց է հնչեցնում՝ ստացվում է, Հայաստանն էլ չի՞ ճանաչում այդ իրավունքը։
«Հայաստանի իշխանությունը միացել է Ադրբեջանին՝ հակադրելով իրեն միջազգային բոլոր իրավական նորմերին: Ո՞վ է ընդհանրապես որոշում այս կամ այն տարածքի պատկանելիությունը։ Հստակեցնեմ, որ Ադրբեջանը ճանաչելու ժամանակ միայն Մեծ Բրիտանիան է նշել, որ ինքը ճանաչում է Ադրբեջանը ներառյալ Լեռնային Ղարաբաղը, որովհետև հանքերի վաճառքի գործընթացն էր գնում, հետևաբար՝ վարչապետի խոսքը ոչ մի աղերս չունի միջազգային որևէ փաստաթղթի հետ»,-ասաց Լարիսա Ալավերդյանը։
Այսօր արդեն 31-րդ օրն է, ինչ Ադրբեջանը փակել է Արցախը արտաքին աշխարհի հետ կապող միակ ցամաքային ճանապարհը, ի՞նչ լուծումներ է տեսնում ՄԻ նախկին պաշտպանը։
«Պետք է բոլոր մտածող մարդկանց կողմից արտահայտվի Հայաստանի ժողովրդի և հայության դիրքորոշումը և պարտադրվի յուր իշխանությանը կատարել սահմանադրորեն և օրենսդրորեն բոլոր պարտականությունները՝ ներառյալ ՀՀ-ի Սահմանադրության, օրենսդրության մեջ նշված բոլոր որոշումները, որոնք արգելում են խոսել կամ ստորագրել որևէ փաստաթուղթ, որտեղ Լեռնային Ղարաբաղը համարվում է Ադրբեջանի կազմում»,- ասաց Լարիսա Ալավերդյանը։
Ինչ վերաբերում է հարցին, թե ստեղծված իրավիճակում որո՞նք պետք է լինեն միջազգային հանրության գործուն քայլերը, Լարիսա Ալավերդյանն արձագանքեց՝ հստակ պետք է լինի այնպիսի որոշում, որը կկպչի Ադրբեջանի քաղաքական վերնախավի անձնական շահերին, իսկ նրանց հաշիվները տարբեր երկրներում լեփլեցուն են։ Արդյո՞ք պատժամիջոցները կսաստեն Բաքվին.
«Եթե խոսում ենք ընդհանրապես պատժամիջոցների մասին, այսօր Ադրբեջանն ամենակոպիտ ձևով է վարվում, այնպես որ միջազգային հանրությունը պետք է ոչ թե կրավորական հայտարարություններով և կոչերով հանդես գա, այլ հստակ գործիքակազմով»,-խոսքն ամփոփեց Լարիսա Ալավերդյանը։
Շուշանիկ Միսկարյան