Այս պահին հստակ չեմ կարող ասել, թե քանի հոգի են տարել: Առավոտյան մի քանի ոստիկաններ եկել են մեր տուն խուզարկություն իրականացնելու, մասկի-շոու՝ մի չորս-հինգ մեքենա: Յոթ-ութ հոգի խուզարկողներ էին, որպեսզի, երևի թե, ընտանիքի անդամներին համագյուղացիներին վախեցնեն: Այս մասին MediaHub-ի հետ զրույցում ասաց ՀՅԴ Արարատի մարզի մարզային կոմիտեի ղեկավար Գերասիմ Վարդանյանը:
Նա նշեց, որ խուզարկություն են իրականացրել, ոչինչ չեն հայտնաբերել, ընդամենը էլեկտրոնային կրիչ են առգրավել.
«Սա հերթական քաղաքական հետապնդումն է, հերթական քաղաքական շոուն է, որով փորձում են մեզ վախեցնել: Դրանից հետո տեղեկություն ստացա, որ ոչ միայն մեր տունն են խուզարկել, այլև Արարատի մարզում իմ հարազատների և կուսակցական ընկերների տներն են մտել խուզարկության: Այս պահին կան բերման ենթարկվածներ Արարատի մարզից, իսկ ինձ ժամը 15.00-ին հրավիրել են Մասիսի Քննչական բաժին հարցաքննության»,- պատմեց Գերասիմ Վարդանյանը:
Նա կարծիք հայտնեց, որ այս հետապնդումը կապ ունի երեկ Վճռաբեկ դատարանի որոշման հետ, որը մերժել էր գլխավոր դատախազի տեղակալի բողոքը բեկանելու նախկին որոշումը, որպեսզի իրեն կրկին տանեն կալանավորեն: Վճռաբեկ դատարանը, ըստ մեր զրուցակցի, արդարացի որոշում է կայացրել ու մերժել դատախազության պահանջը և հաջորդ իսկ օրը դիմակավորված շոուներ սկսվեցին՝ մարդկանց վախեցնելու, ահաբեկելու նպատակով.
“Իրենք էլ լավ գիտեն, որ դրանով ո՛չ ինձ են կանգնեցնելու, ո՛չ մեր ընկերներին. Մեր համար տարբերություն չկա՝ այսօր դուրսն ենք, վաղը բանտում ենք, հետո նորից դուրսը: Ուր էլ լինենք, պետք է Նիկոլ Փաշինյանը պատասխան տա այս ամենի համար: Այն, ինչ կատարվում է, ես կարող եմ հասկանալ ու ընդունել, բայց այն, ինչ կատարվում է իմ հարազատների, ընկերների ու կուսակիցների նկատմամբ, այն, ինչ իրենք անում են, այդ ամենը հետևանքներ է ունենալու: Սխալ է մտնել ընկերական, անձնական շրջապատ՝ սա հետևանքներ է ունենալու”,- ասաց Վարդանյանը:
Ավելի վաղ ՀՅԴ ԳՄ ներկայացուցիչ Իշխան Սաղաթելյանը հայտնել էր, որ այսօր վաղ առավոտյան ժամը յոթի սահմաններում, ուժային կառույցների ներկայացուցիչները Արարատի մարզում և Երևանում ներխուժել են ՀՅԴ մի շարք անդամների բնակարաններ խուզարկություն իրականացնելու պատրվակով, կան բերման ենթարկվածներ:
Լիա Սարգսյան