Թուրքիայի նախագահ Ռեջեփ Թայիփ Էրդողանն ու Սիրիայի նախագահ Բաշար Ասադը կարող են հանդիպել սեպտեմբերին Ուզբեկստանում կայանալիք Շանհայյան համագործակցության կազմակերպության գագաթնաժողովի շրջանակում. այդ մասին հայտնում է իրանական Tasnim գործակալությունը՝ հղում անելով իր աղբյուրներին:
Ավելի վաղ Էրդողանը հայտարարել էր, որ իր ռուս գործընկեր Վլադիմիր Պուտինը հրավիրել է իրեն մասնակցելու ՇՀԿ հանդիպմանը: Գործակալությունը նշում է, որ Պուտինը մասնակցության հրավեր է ուղարկել նաև Ասադին:
Գործակալության տվյալներով՝ թուրքական «Հայրենիք» կուսակցության առաջնորդ Դողու Փերինչեքը քաղաքական և դիվանագիտական պատվիրակության կազմում շուտով կմեկնի Սիրիա, որտեղ կհանդիպի և բանակցություններ կվարի նախագահ Բաշար Ասադի հետ։
Դա կլինի առաջին չվերթը թուրքական օդանավակայանից Դամասկոս վերջին 10 տարվա ընթացքում (2011 թվականից ի վեր ուղիղ չվերթներ չեն իրականացվել):
«Այս ուղևորության կիզակետում կլինեն հարաբերությունները վերականգնելու ուղիները, Սիրիայի հյուսիսում ահաբեկչության դեմ համատեղ պայքարը և փախստականների վերադարձը: Նաև ստացված տեղեկատվության հիման վրա, եթե այս հանդիպումը դրական լինի, հավանաբար երկու երկրների ղեկավարները կհանդիպեն միմյանց Ուզբեկստանում Շանհայյան համագործակցության կազմակերպության առաջիկա հանդիպման շրջանակում, որը կկայանա Ուզբեկստանում սեպտեմբերի վերջին օրերին», - նշել է գործակալությունը։