Ողջունելով Կայուն շուկաների հարցերով Նախաձեռնության չինական խորհրդի (SMI) բացումը՝ Ուելսի արքայազն Չառլզը հայտարարել է, որ կլիմայի փոփոխության խնդիրը պարզապես չի կարող լուծվել առանց Չինաստանի, հաղորդում է PA Media-ն:
SMI-ն Չառլզի կողմից գործարկվել է 2020 թվականին եւ միավորում է միջազգային դերակատարներին մասնավոր, պետական եւ բարեգործական հատվածներից՝ համաշխարհային տնտեսության դեկարբոնիզացման եւ կայուն շուկաներին անցում կատարելու ուղիներ գտնելու համար։
Տեսաուղերձում արքայազնը նշել է, որ մարդկության ապագան կախված է «ավելի հրատապ լուծումից»։
«Կլիմայի փոփոխությունը եւ կենսաբազմազանության կորուստը, ինչպես աշխարհում երկու ամենասարսափելի եւ հրատապ սպառնալիքներից երկուսը, պարզապես չեն կարող լուծվել առանց Չինաստանի: Գլազգոյում կայացած Cop26 համաժողովում եւ Cop15-ում Չինաստանի նախագահության շնորհիվ աշխարհը որոշակի առաջընթաց է գրանցել դեպի զուտ զրոյական, կենսաբազմազանության դրական եւ կայուն ապագա: Բայց կառավարությունները միայնակ չեն կարող հասնել այդ նպատակներին: Արդյունաբերությունը պետք է կենտրոնական դեր խաղա կանաչ անցումը արագացնելու մեր ջանքերում: Ֆինանսավորման մոբիլիզացումը որոշիչ նշանակություն կունենա»,- նշել է բրիտանական գահի ժառանգորդը:
«Չինաստանում են տեղակայված աշխարհի խոշորագույն բանկերն ու ապահովագրողները: Չինական ընկերությունները նաեւ «կանաչ» տեխնոլոգիաների համաշխարհային առաջատարներն են՝ էլեկտրամոբիլներից մինչեւ էներգիայի վերականգնվող աղբյուրներ: Հետեւաբար, SMI China Խորհրդի շրջանակներում ձեր կոլեկտիվ գործողությունները կենսական դեր կխաղան դեպի ավելի էկոլոգիական տնտեսություն գլոբալ անցման մեջ»,- հավելել է արքայազն Չառլզը:
Չառլզը նախկինում վատ հարաբերություններ է ունեցել Չինաստանի ղեկավարության հետ, բայց, կարծես, դրանք ավելի ամուր են դարձել Չինաստանի նախագահ Սի Ծինփինի օրոք, որի հետ նա հանդիպել է 2015 թվականին Մեծ Բրիտանիա Չինաստանի առաջնորդի կատարած պետական այցի ժամանակ: