Բժիշկ-ալերգոլոգ, իմունաբան Վլադիմիր Բոլիբիկը Москва 24-ի հետ զրույցում նշել է մի խումբ մարդկանց մասին, որոնք կարող են անընկալունակ լինել կապիկի ծաղկի հանդեպ։
Հուլիսի 12-ին Ռուսաստանում հայտնաբերվել է այդ հիվանդությամբ վարակման առաջին դեպքը։ Վիրուսը հայտնաբերվել է սանկտպետերբուրգցի մի երիտասարդի մոտ, որը վերադարձել էր Եվրոպայից եւ դիմել էր բուժհաստատություն, քանի որ բնորոշ ցան էր ունեցել։
Փորձագետի խոսքով՝ կա մարդկանց որոշակի խումբ, որոնք կարող են պաշտպանված լինել կապիկի ծաղկից։
«Սա ընդամենը ենթադրություն է, բայց ընդհանրապես նրանք, ովքեր մեզ մոտ պատվաստված են բնական ծաղկի դեմ, իսկ նրանք 40-ն անց մարդիկ են, տեսականորեն պահպանում են իմունիտետը դրա դեմ։ Իսկ դա խաչաձեւ պաշտպանում է կապիկի ծաղկից։ Այսինքն՝ նրանք այն մարդիկ են, ովքեր ծնվել են 1980թ. եւ ավելի վաղ»,- նշել է բժիշկը։
Իմունաբանը հիշեցրել է, որ հիվանդությունը փոխանցվում է սերտ շփման դեպքում, իսկ ինկուբացիոն շրջանի ավարտից հետո վարակվածների մոտ ցան եւ ջերմություն են առաջանում։
«Ես ենթադրում եմ, որ ինչ-որ մեկը կարող է ծածուկ ընթացք ունենալ, ինչպես եւ ցանկացած այլ հիվանդության դեպքում. լինում են տարբերակներ՝ կայծակնայինից մինչեւ ծածուկ ընթացք։ Այսինքն՝ մարդը չգիտի, որ ինքը հիվանդ է եւ պարզապես այդ հարուցչի կրող է։ Ցանկացած վարակի դեպքում այս ամբողջ սպեկտրը հանդիպելու է»,- նշել է փորձագետը։