Տելեգրամյան ալիքներից մեկը լուր էր հրապարակել, որից հետևում է, որ նախօրեին կաթողիկոս Գարեգին երկրորդը կրկին հանդիպել է ՀՀ առաջին նախագահ Լևոն Տեր-Պետրոսյանին:
Նշվում է, որ զրուցակիցները քննարկել են երկրի նախկին երեք նախագահների կողմից օրերս արված հայտարարությունները և դրանց հնարավոր ազդեցության խնդիրը սեպտեմբերի 23-իմ Մայր Աթոռում Կաթողիկոսի և Հայաստանի ու Արցախի նախկին նախագահների մասնակցությամբ սկիզբ առած գործընթացի հետագա ընթացքի վրա: Ըստ աղբյուրի՝ զրույցի ընթացքում Վեհափառը բողոքել է, որ իր վրա մեծ ճնշում են գործադրում ընդդիմադիր հայացքներ ունեցող եպիսկոպոսները: Բացի այդ, նշվում է, որ նույնաբովանդակ զրույց Կաթողիկոսն ունեցել է նաև Նիկոլ Փաշինյանի հետ, ինչի մասին Փաշինյանը երկու օր առաջ տեղեկացրել է իր թիմակիցներին Խորհրդարանում կայացած փակ հանդիպման ժամանակ:
Նշենք, որ պաշտոնական տեղեկատվություն այս հանդիպումների մասին չկա:
MediaHub-ը կապ հաստատեց Մայր Աթոռի Տեղեկատվական համակարգի տնօրեն Տ. Եսայի քահանա Արթենյանի հետ, որը նշեց.
«ՀՀ և ԼՂՀ նախագահների հաջորդ հանդիպման նախապատրաստման նպատակով Ամենայն Հայոց Կաթողիկոսը այս օրերին առանձին հանդիպումներ է ունեցել նախագահների հետ։
Հաստատում ենք, որ երեկ տեղի է ունեցել հանդիպում ՀՀ առաջին նախագահ Լևոն Տեր-Պետրոսյանի հետ։ Առանձնազրույցի բովանդակության և նաև վարչապետի հետ հանդիպման վերաբերյալ տարածվող նյութերը կեղծ են։ Կարծում ենք, որ այս ամենը նպատակ է հետապնդում ձախողել նախաձեռնված քննարկումների գործընթացը»,- ասաց նա ։
Ավելի վաղ նաև ՀՀ առաջին նախագահի խոսնակ Արման Մուսինյանն էր հաստատել հանդիպման մասին լուրը.
«Ամենայն Հայոց Կաթողիկոսը և ՀՀ Առաջին նախագահը քառասուն տարվա գործընկերներ են Գեւորգյան ճեմարանում եւ «Էջմիածին» ամսագրում համատեղ աշխատանքի ժամանակներից։ Ուստի, նրանց հանդիպումները զարմանք չպետք է հարուցեն։
Ինչ վերաբերում է տելեգրամյան ալիքի այսօրվա հրապարակած հորինվածքներին, դրանք պարզապես միտված են իշխանության եւ ընդդիմության հնարավոր երկխոսության վիժեցմանը»,- հայտնել էր Մուսինյանը: