ԱԺ-ում քննարկվում է Կառավարության կողմից ներկայացված «Պետական գաղտնիքի մասին» և կից ներկայացված օրենքների նախագծերի փաթեթը, որի նպատակն է ամբողջությամբ վերանայել «Պետական և ծառայողական գաղտնիքի մասին» գործող օրենքը՝ այն համապատասխանեցնելով գործող օրենսդրությանը և միջազգային չափանիշներին։
«Առաջարկվում է օրենքը վերնագրել Պետական գաղտնիքի մասին, դրանից հանելով ծառայողական գաղտնիքին վերաբերող կարգավորումները: Արդյունքում գաղտնի դրոշմագիր ունեցող տեղեկությունները նույնպես կդասվեն պետական գաղտնիքի շարքին, իսկ պետական գաղտնիք հանդիսացող տեղեկությունները կունենան հատուկ կարևորության հույժ գաղտնի և գաղտնի դրոշմագրեր»,-ասաց նախագծի հիմնական զեկուցող, ԱԱԾ տնօրենի տեղակալ Տիգրան Հարությունյանը։
Օրենքի նախագծի համաձայն՝ պետական գաղտնիք պարունակող հատուկ կարևորության և հույժ գաղտնի դրոշմագրեր ունեցող տեղեկություններին առնչվելու թույլտվություն ունեցող անձինք պարտավոր են լինելու օտարերկրյա պետություններ մասնավոր այցելության դեպքում ԱԱԾ-ին այդ մասին սահմանված կարգով տեղեկացնել։
«Նախագծով առաջարկվում է նաև խստացնել պետական գաղտնիք հրապարակելու համար նախատեսված քրեական պատասխանատվությունը, միաժամանակ վարչական պատասխանատվություն է նախատեսվում գաղտնի դրոշմագիր ունեցող տեղեկությունները հրապարակելու, ինչպես նաև պետական գաղտնիք պարունակող տեղեկություններին առնչվելու թույլտվություն ունեցող անձի կողմից իր նկատմամբ կիրառված սահմանափակումները խախտելու համար»,-ասաց Հարությունյանը, կոչ անելով պատգամավորներին, որպեսզի օրենքի այս նախագիծն առաջին ընթերցմամբ ընդունվի։
Մանրամասները՝ տեսանյութում: