ԱԺ «Հայաստան» դաշինքի պատգամավոր, «Վերածնվող Հայաստան» կուսակցության ղեկավար Վահե Հակոբյանն այսօր MediaHub-ի հետ զրույցում, անդրադառնալով ԱԺ ընդդիմադիր պատգամավորներ Աննա Գրիգորյանի, Արթուր Սարգսյանի եւ Գորիսի քաղաքապետ Առուշ Առուշանյանի կուսակցությունից դուրս գալու որոշմանն ասել էր, որ Առուշանյանը կուսակցությունից դուրս գալու դիմում չի ներկայացրել։ Մինչդեռ Առուշ Առուշանյանը MediaHub-ի հետ զրույցում պնդում է՝ կուսակցությունից վաղուց է դուրս եկել։
«Ոչ մեկի հետ էլ ես չեմ վիճել, կուսակցությունից վաղուց եմ դուրս եկել, չեմ ուզում կուսակցական լինել»,-«Վերածնվող Հայաստան» կուսակցությունից դուրս գալու իր որոշումը այսպես է մեկնաբանում Գորիսի քաղաքապետը։ Առուշանյանից հետաքրքրվեցինք նաեւ, թե ի՞նչ «սեւ կատու» է անցել սյունեցի պատգամավորների և Վահե Հակոբյանի միջեւ։
«Ես միայն իմ տեղն եմ խոսում, մյուսների համար չեմ կարող ասել։ Իմ որոշումը վաղուց եմ կայացրել։ Մյուսների որոշման մասին տեղյակ չեմ»,-նշեց նա:
Ավելի վաղ MediaHub-ի հետ զրույցում Վահե Հակոբյանը, անդրադառնալով խոսակցություններին, թե իր և Առուշանյանի միջև հակասություններ գոյություն ունեն, մասնավորապես ասել էր.
«Առուշանյանի հետ որևէ տարաձայնություն չունեմ։ Առուշ Առուշանյանը պատգամավոր չէ, նա ակտիվ քաղաքականությամբ չի զբաղվում և հետո՝ նա դիմում չի ներկայացրել․ Աննա Գրիգորյանը, միգուցե, մի քիչ շտապում է»:
Ըստ այդմ, Վահե Հակոբյանն ակնարկել էր, թե Աննա Գրիգորյանը, որը հայտնել էր կուսակցությունից իր և գործընկերների դուրս գալու մասին, ճիշտ տեղեկատվության չի տիրապետում:
Լիա Սարգսյան