Աշխարհում տարածվում է կորոնավիրուսի նոր «կրակեն» շտամը
Չինաստանում Covid-ի դեպքերի գագաթնակետն է. 60 տարվա մեջ առաջին անգամ երկրի բնակչությունը նվազել է՝ անկումը կազմել է մեկ միլիոն մարդ։ Մասնագետները չեն բացառում ժողովրդագրական խնդրի կապը Covid-ի բռնկման հետ, իսկ բռնկումն ինքնին բացատրվում է Covid-ի խիստ սահմանափակումների հանկարծակի վերացմամբ՝ մարդիկ պատրաստ չէին դիմակայել վիրուսի նոր մուտացիաներին։ Հունվարին Ռուսաստանում հայտնաբերվել է կորոնավիրուսի «կրակեն» կոչվող շտամով վարակման առաջին դեպքը։
«Կրակեն»-ը XBB.1.5 կորոնավիրուսի մուտացիա է, որն արդեն ակտիվորեն տարածվում է ԱՄՆ-ում։
Առողջապահության համաշխարհային կազմակերպությունը XBB.1.5-ը համարել է «Օմիկրոն»-ի մինչ օրս առավել փոխանցվող տարբերակը և հայտարարել, որ երկրները պետք է հաշվի առնեն ռիսկային իրավիճակները, օրինակ, թռիչքների համար դիմակներ առաջարկելու հարցը:
ԱՀԿ տվյալներով՝ նոր շտամով վարակվելու դեպքեր գրանցվել են 38 երկրում, որոնց թվում են Հարավային Կորեան, Ավստրալիան,եվրոպական մի շարք երկրներ:
Կորոնավիրուսի նոր ենթատեսակի հիմնական վտանգը այն է, որ այն կարողանում է հեռանալ օրգանիզմի իմունային պատասխանից։ Բացի այդ, այն դիմացկուն է պատվաստանյութի կողմից տրամադրվող պաշտպանությանը և կարող է նորից վարակել նրանց, ովքեր համեմատաբար վերջերս հիվանդացել են COVID-19-ի նախկին ձևերով: Նրա մարդուց մարդուն փոխանցվելու բարձր ունակությունը նշանակում է, որ «կրակենից» ավելի ծանր հետևանքներ կլինեն։
Վիրուսի առաջացումը համընկել է մրսածության աճի հետ, որը կարող է կրկնակի ուժով հարվածել վարակված մարդու մարմնին։ Սակայն, ըստ ամերիկացի գիտնականների, նոր XBB.1.5-ի և Omicron-ի նախկին տարբերակների միջև ծանրության հատուկ տարբերություններ դեռևս չեն հայտնաբերվել: Կլինիկական պատկերը գրեթե նույնն է։