Հետաքննությունների դաշնային բյուրոն քրեական հետաքննություն է սկսել Կենտրոնական հետախուզական վարչության նախկին տնօրեն Ջոն Բրենանի և ՀԴԲ-ի նախկին տնօրեն Ջեյմս Քոմիի դեմ, հաղորդել է «Fox News»-ը՝ հղում անելով ԱՄՆ Արդարադատության նախարարության աղբյուրների:

Հեռուստաալիքի տվյալներով՝ գործը վերաբերում է Դոնալդ Թրամփի՝ Ռուսաստանի հետ ենթադրյալ կապերի և 2016 թվականի նախագահական ընտրություններին Մոսկվայի միջամտության հետաքննության ընթացքում թույլ տրված հնարավոր խախտումներին: Հետաքննիչները մտադիր են ստուգել, ​​թե արդյոք Բրենանը և Քոմին կեղծ ցուցմունքներ են տվել:

Հուլիսի 3-ին ԿՀՎ-ն հրապարակել էր զեկույց, որի համաձայն՝ 2016 թվականի ընտրություններին Ռուսաստանի միջամտության վերաբերյալ ԱՄՆ հետախուզական զեկույցը կազմվել է ընթացակարգային խախտումներով և կարող էր քաղաքական դրդապատճառներ ունենալ: Փաստաթուղթը կազմվել է ԿՀՎ-ի ներկայիս տնօրեն Ջոն Ռատկլիֆի հանձնարարությամբ:

Հրապարակումից հետո Ռատկլիֆը X սոցիալական ցանցում հայտարարել է, որ ընտրությունների զեկույցը կազմվել է կոռումպացված գործընթացի և քաղաքական կողմնակալության միջոցով, որում, նրա կարծիքով, ներգրավված են Բրենանը և Քոմին: