Բունդեսբանկի նախագահ Յոահիմ Նագելը հայտարարել է, որ աշնան ամիսներին Գերմանիայում գնաճը կարող է երկնիշ թվի հասնել։
«Վառելիքի զեղչը եւ ինը եվրո արժողությամբ տոմսի ժամկետը լրանում է, ինչը պետք է մեկ տոկոսային կետով բարձրացնի գնաճի մակարդակը»,- Rheinische Post-ին տված հարցազրույցում ասել է Նագելը:
Կլինի գազի հավելավճար, որի դիմաց անհրաժեշտ է նվազեցնել գազի ավելացված արժեքի հարկը, ինչն իր հերթին կնվազեցնի գները։ «Ընդհանուր առմամբ, նույնիսկ աշնան ամիսներին հնարավոր է տասը տոկոս գնաճ»։
Նագելը նաեւ նշել է, որ Գերմանիայում վերջին անգամ երկնիշ գնաճ գրանցվել է ավելի քան յոթանասուն տարի առաջ:
Բունդեսբանկի նախագահը նաեւ լիարժեք հստակություն չի տվել գալիք տարվա համար։ Նրա խոսքով՝ գնաճի հարցը չի վերանա նույնիսկ 2023 թվականին։ Ռուսաստանը կտրուկ կրճատել է գազի մատակարարումները, բնական գազի ու էլեկտրաէներգիայի գները սպասվածից ավելի են թանկացել։ Այն բանից հետո, երբ 2022 թվականին գնաճը եվրոպական հաշվարկներով պետք է լինի ութ տոկոս, Նագելը հաջորդ տարի ակնկալում է վեց տոկոս մակարդակ:
Նագելը կոչ է արել Եվրոպական կենտրոնական բանկին (ԵԿԲ) էլ ավելի բարձրացնել տոկոսադրույքները։
«Շատ կարեւոր է միջնաժամկետ գնաճային սպասումները երկու տոկոսի մակարդակում պահելը։ Համոզված եմ, որ ԵԿԲ-ի Կառավարման խորհուրդը դրամավարկային քաղաքականության անհրաժեշտ միջոցներ կձեռնարկի»,- ասել է Բունդեսբանկի նախագահը։ Հուլիսին ԵԿԲ-ն տոկոսադրույքները բարձրացրել է 0,50 տոկոսային կետով։
Միաժամանակ, Գերմանիայի Կենտրոնական բանկի ղեկավարը հոռետեսորեն է գնահատել տնտեսական զարգացումը։
«Եթե էներգետիկ ճգնաժամը հասնի իր գագաթնակետին, ապա այս ձմռանը ռեցեսիա կսկսվի»,- ասել է նա: