Թալիբներից թաքնվող աֆղանցի նախկին կին-դատավորը բողոք է ներկայացրել Ներքին գործերի նախարարությանը այն բանից հետո, երբ վերջինս մերժել է Մեծ Բրիտանիա մուտք գործելու թույլտվություն ստանալու նրա դիմումը, հաղորդում է PA Media-ն:

Kingsley Napley-ի փաստաբանները շաբաթ օրը հայտարարել են, որ իրենց պաշտպանյալի եւ նրա որդու անունից իրենց առաջին բողոքարկումն են ներկայացրել Ներգաղթի տրիբունալ:

Ընկերության ներկայացուցիչները հայտարարել են, որ կառավարության որոշումը թույլ չի տվել զույգին վերամիավորվել Մեծ Բրիտանիայում ընտանիքի անդամների, այդ թվում՝ նրա զարմիկի հետ, որն աշխատում է որպես պետական ծառայող:

Նրանք նաեւ հայտարարել են, որ կինը հայտնվել է «խիստ խոցելի վիճակում»՝ Աֆղանստանում թալիբների վարչակարգի վերադարձից հետո։

Հայտարարության մեջ փաստաբանները հայտնել են, որ իրենց պաշտպանյալը եւ նրա որդին փախել են Աֆղանստանից եւ այժմ թաքնվում են Պակիստանում այն բանից հետո, երբ նրա տունը Քաբուլում հարձակման է ենթարկվել, եւ նրա մի քանի նախկին գործընկերները սպանվել են:

Փաստաբաններն ասել են, որ կինը երկու տասնամյակ հաջողակ կարիերա է ունեցել Աֆղանստանի դատական համակարգում՝ զբաղեցնելով բարձր պաշտոններ քրեական դատարանի համակարգում եւ վարել այնպիսի հանցագործություններ, ինչպիսիք են սպանությունը, կանանց նկատմամբ բռնությունը, բռնաբարությունը, ահաբեկչության հանցագործությունները եւ Աֆղանստանի կառավարության դեմ դավադրությունը:

Բողոքարկումն արվել է այն բանից հետո, երբ անցյալ նոյեմբերին Kingsley Napley-ի փաստաբանները դիմումներ են ներկայացրել կնոջ եւ նրա որդու անունից, որոնք վիճարկում են Մարդու իրավունքների եվրոպական դատարանի 8-րդ հոդվածի հիման վրա, որը վերաբերում է անձնական եւ ընտանեկան կյանքը հարգելու իրավունքին:

Սակայն այս ամիս Ներքին գործերի նախարարությունը տեղեկացրել է փաստաբաններին, որ նրանց դիմումները մերժվել են։