ՀՀ նախկին փոխվարչապետ Տիգրան Ավինյանը բավականին բարձր տրամադրությամբ պատրաստվում է մուտք գործել Երևանի քաղաքապետարան և դա չի էլ թաքցնում: Ճիշտ է, առայժմ միայն որպես փոխքաղաքապետ, բայց այն ակնկալիքով, որ փոխքաղաքապետից քաղաքապետի պաշտոն տանող ճանապարհը երկար չի տևի:

Տևական ժամանակ է Տիգրան Ավինյանը ֆեյսբուքյան իր էջի գլխավոր նկարը չէր փոխել: Վերջին թարմացումը, ըստ FB-ի, տեղի էր ունեցել դեռևս 2018-ի նոյեմբերին: Եվ ահա այսօր, Երևանի քաղաքապետ դառնալու իր հավակնությունների մասին լուրերի ակտիվացման ֆոնին, նա նոր լուսանկար է հրապարակել, որից պարզ է, թե ինչ հաղթական տրամադրությամբ է նա պատրաստվում մուտք գործել Երևան քաղաքի թիվ մեկ շենքը:

Հիշեցնենք, որ Տիգրան Ավինյանը իր՝ ՔՊ-ի քաղաքապետի թեկնածու լինելու լուրը թարմացրեց Սուրմալու առևտրի կենտրոնում տեղի ունեցած ողբերգության ֆոնին, ինչը բավականին բացասաբար ընկալվեց հանրության կողմից:

Հաջորդ շաբաթ Երևանի ավագանու նիստում նա կառաջադրվի փոխքաղաքապետի պաշտոնում և արդեն իսկ հանդիպումներ է ունեցել ավագանու երեք խմբակցությունների հետ:

MediaHub-ի հետ զրույցում «Լույս» խմբակցության ղեկավար Դավիթ Խաժակյանը հայտարարեց, որ դեմ չեն քվեարկելու Տիգրան Ավինյանին: Ի դեպ, Խաժակյանն էլ, ըստ շրջանառվող լուրերի, «Լուսավոր Հայաստան» կուսակցության քաղաքապետի թեկնածուն է լինելու, բայց սա արդեն լրիվ այլ պատմություն է...