Լաչինի միջանցքը երեք ամիս է փակ է, և այս պայմաններում իրադրության սրում ունենք։ Այդ մասին այսօր կառավարության նիստի ընթացքում ասաց Նիկոլ Փաշինյանը։
Նրա խոսքով՝ նախորդ կիրակի օրը Ադրբեջանի ԶՈւ մի ստորաբաժանում դարանակալել և հարձակվել է Ստեփանակերտից «ՈւԱԶ» մակնիշի մեքենայով ծառայողական նպատակով ԼՂ Հին Շեն և Մեծ Շեն գյուղեր ուղևորվող ոստիկանների վրա։
«Ոստիկաններից երեքը զոհվել են։ Ուզում եմ ընդգծել, որ երեք զոհվածներն էլ ծնվել են Լեռնային Ղարաբաղում: Այդ հանգամանքը կարևորություն է ստանում 2023 թվականի փետրվարի 18-ին Մյունխենի անվտանգության համաժողովում Ադրբեջանի արած հայտարարություններից մեկի ֆոնին, իսկ Ադրբեջանի նախագահը Մյունխենում ընդունել էր, որ գոյություն ունի միջազգային պայմանավորվածություն՝ համաձայն որի, իրենք պետք է Լեռնային Ղարաբաղի հայության ներկայացուցիչների հետ քննարկեն վերջիններիս իրավունքների և անվտանգության հարցը: Ադրբեջանի նախագահը, սակայն, ընդգծել էր, թե այդ քննարկումներն իրենք պատրաստվում են ունենալ ԼՂ-ում ծնված և ապրած մարդկանց հետ»,- նշեց նա։
Ըստ Փաշինյանի՝ մարտի 5-ի ահաբեկչությամբ Ադրբեջանը մի քանի նպատակ է հետապնդում։ «Ադրբեջանը ցանկանում է կեղծ ապացույցներ ստեղծել, թե Հայաստանից ԼՂ զենք-զինամթերք է տեղափոխվում։ Բայց դա չստացվեց, քանի որ ոստիկանության մեքենան ոչ թե գնում էր Ստեփանակերտ, այլ՝ գալիս էր Ստեփանակերտից։ Բացի այդ, Արցախի ՆԳ նախարարությունը նկարահանել էր ամբողջ ընթացքը»,- նկատեց Նիկոլ Փաշինյանը։
Մանրամասները՝ տեսանյութում։