Մեծ Բրիտանիան եւ Ֆրանսիան Լա Մանշով անօրինական միգրանտների վտանգավոր փոխադրումը կանխելուն ուղղված ջանքերն ակտիվացնելու նպատակով 72,2 միլիոն եվրոյի համաձայնագիր են ստորագրել հաջորդ տարվա համար:
Այս տարի փոքր նավակներով ավելի քան 40 000 մարդ է անցել Լա Մանշը նախորդ տարվա 28 526-ի համեմատ, ինչը Բրիտանիայի նոր վարչապետ Ռիշի Սունակին եւ ներքին գործերի նախարար Սուելլա Բրավերմանին ստիպել է անել ավելին՝ հոսքը դադարեցնելու համար։
«Բրիտանիայի եւ Ֆրանիսիայի կառավարությունների շահերից է բխում միասին աշխատել այս բարդ խնդրի լուծման ուղղությամբ»,-նշվում է Բրավերմանի հայտարարությունում Ֆրանսիայի ներքին գործերի նախարար Ջերալդ Դարմանի հետ հանդիպումից հետո։
«Չկան արագ լուծումներ, բայց այս նոր պայմանավորվածությունը կնշանակի, որ մենք կարող ենք զգալիորեն ավելացնել ֆրանսիացի ժանդարմների թիվը, որոնք պարեկային ծառայություն են կատարում Ֆրանսիայի հյուսիսային լողափերին եւ երաշխավորել, որ բրիտանացի եւ ֆրանսիացի սպաները մաքսանենգներին կանգնեցնելու համար կաշխատեն միասին»:
Բրիտանիայի կառավարությունը հայտարարել է, որ գործարքի արդյունքում Բրիտանիայի կողմից ֆինանսավորվող սպաների թիվը, որոնք Ֆրանսիայի լողափերին պարեկային ծառայություն են կատարում, առաջիկա ամիսներին 40 տոկոսով կավելանա։