Ճապոնիան առաջարկել է ավստրալական ատոմային սուզանավեր տեղակայել։ Դեսպան Սինգո Յամագամին ասել է, որ Ճապոնիան պատրաստ է համագործակցել առաջավոր տեխնոլոգիաների ոլորտում՝ Ավստրալիայի, ԱՄՆ-ի եւ Մեծ Բրիտանիայի ռազմական համաձայնագրի շրջանակում, տեղեկացրել է AAP-ը։

Յամագամին խոստովանել է, որ Ճապոնիայի տեղը անվտանգության եռակողմ պակտում կարող է միանգամից ակնհայտ չթվալ, բայց ազգային անվտանգությունը կապված է դաշնակիցների՝ պոտենցիալ հակառակորդներին զսպելու կարողության հետ։ «Մենք ճակատամերձ պետություն ենք, որը բախվում է բարդ հանգամանքների՝ Հարավարեւելյան Ասիայում վտանգավոր հարեւանության պատճառով»,- ասել է Յամագամին։

Ավստրալիան ատոմային սուզանավեր է գնում համաձայնագրի համապատասխան, եւ Ճապոնիան առաջարկել է դրանք տեղակայել իր մոտ։ «Այդ սուզանավերը կուժեղացնեն զսպումը տարածաշրջանում»,- ասել է Յամագամին։ «Արդեն ընդունվել են որոշ միջոցներ դրանք տեղակայելու համար»։

Պաշտպանության նախարարի օգնական Մեթ Թիստլթուեյթը ասել է, որ Ճապոնիան կարեւոր գործընկեր է տարածաշրջանում, երբ խոսքը վերաբերում է խաղաղության եւ կայունության ապահովմանը։ «Մենք, անկասկած, հարգում ենք այն դերը, որը խաղում է Ճապոնիան տարածաշրջանում»,- ասել է նա։ «Մենք կձգտենք շարունակել այդ հարաբերությունները Ճապոնիայի եւ այլ երկրների հետ Quad-ի միջոցով»։

Quad-ի կազմի մեջ են Ավստրալիան, Հնդկաստանը եւ ԱՄՆ-ը, նպատակը՝ Հնդկա-Խաղաղօվկիանոսյան տարածաշրջանում անվտանգության ապահովումն է։

Յամագամին կրկնել է վարչապետ Ֆումիո Կիսիդայի խոսքերն այն մասին, որ «Ուկրաինան այսօր կարող է դառնալ Արեւելյան Ասիա վաղը»։

Ուղիղ չխոսելով Չինաստանի՝ որպես սպառնալիքի մասին՝ Յամագամին հայտարարել է դաշինքների անհրաժեշտության մասին՝ ավելի վտանգավոր տարածաշրջանը կառավարելու համար։

NEWS.am