Գերմանական բիզնեսի բարձր ղեկավարների խումբը զգուշացնում է Չինաստանից հեռանալու հետ կապված՝ ընդունելով, որ Գերմանիան իրավունք ունի վերանայել հարաբերությունները Պեկինի հետ։

Ութ ընկերությունների ղեկավարներ, որոնց թվում են Siemens արդյունաբերական հսկայի, քիմիական նյութեր արտադրող BASF-ի, Bosch տեխնոլոգիական ընկերության, Schaeffler ավտոպահեստամասեր մատակարարողի եւ Համբուրգի նավահանգստի ղեկավարները, հոդված են հրապարակել Frankfurter Allgemeine Zeitung օրաթերթում։

Նրանց խոսքով՝ գերմանական ընկերությունների հարթակները Չինաստանում եւ աշխարհի այլ երկրներում զգալի ավանդ են ներդնում նրանց մրցունակության գործում, եւ Չինաստանն աշխարհում մեծությամբ երկրորդ եւ առավել դինամիկ շուկան է, «ուստի մեր ներկայությունն այնտեղ հատկապես կարեւոր է Գերմանիայի տնտեսական հզորության շահերի տեսանկյունից»։

Հեղինակները հավաստիացրել են, որ չինական  շուկայի պոտենցիալը հնարավորություն է տալիս ավելի արագ ընդլայնվել եւ ավելի մեծ հաջողության հասնել  այլ շուկաներում՝ աշխատատեղեր ապահովելուվ Գերմանիայում։

Նրանք հայտարարել են, որ նկատի ունենալով Չինաստանի պահվածքը եւ Սինցզյան նահանգում իրավիճակը մարդու իրավունքների հետ կապված, «Գերմանիայի համար այսօր ճիշտ կլինի հարաբերությունները Չինաստանի հետ ավելի նուրբ կառուցել, մրցակցության, համագործակցության եւ համակարգային մրցակցության երեք չափումներով»։

«Չնայած Չինաստանի բոլոր մարտահրավերներին՝ մենք համոզված ենք, որ նրա աճի հիմնարար դինամիկան կպահպանվի»,- գրել են հեղինակները։ «Չինաստանից դուրս գալը մեզ կկտրեր այդ հնարավորություններից»։

Վերջին շաբաթներին չինական ներդրումները Գերմանիայում հայտնվել են ուշադրության կենտրոնում, քանի որ պաշտոնատար անձինք ձգտում են հավասարակշռել գործնական հարաբերությունները սխալները կրկնելուց խուսափելու համար, որոնք թույլ են տրվել Ռուսաստանի դեպքում, որը մի ժամանակ Գերմանիա էր մատակարարում բնական գազի ավելի քան կեսը։

Անցած ամիս կանցլեր Օլաֆ Շոլցի կառավարող կոալիցիան տարաձայնություններ ունեցավ չինական նավագնացային COSCO ընկերության հետ կապված, որը ցանկանում էր գնել Համբուրգի նավահանգստի կոնտեյներային տերմինալի բաժնեթղթերի 35 տոկոսը։ Արդյունքում՝ կառավարությունը COSCO-ին թույլ տվեց գնել 25 տոկոսից քիչ՝ երաշխավորելով, որ այն հնարավորություն չի ստանա արգելափակել ընկերության որոշումները։

Չորեքշաբթի կառավարությունն արգելեց Գերմանիայում չիպերի արտադրության գործարանը վաճառել չինական ընկերությանը։

Անցած շաբաթ Շոլցն այցելել էր Պեկին։ Նա խրախուսում է ընկերությունների դիվերսիֆիկացիան, բայց չի խոչընդոտում Չինաստանի հետ բիզնեսի զարգացմանը։ Այցից առաջ նա ասել էր, որ «մենք չենք ցանկանում հեռանալ Չինաստանից», բայց «կնվազեցնենք միակողմանի կախումը՝ խելամիտ դիվերսիֆիկացիայի ոգով»։