Լաչինի միջանցքը արդեն 38 օր փակ է, և միայն հունվարի 17-ին 16 երեխաներ կարողացան վերադառնալ Արցախ՝ Գորիսից: Նրանցից մեկն էլ 15-ամյա Սերգեյն է, ով ամենից շատ ոչ թե իր, այլ խմբի աղջիկների համար էր անհանգստանում.

«Ընդհանուր առմամբ, ինքը վատ վիճակում չէ, փառք Աստծո՝ տուն է հասել: Բնականաբար, դեռ սթրեսային վիճակում երկար կմնա, ուղղակի շատ անհանգստացած է եղել աղջիկների համար, որովհետև ասացին, որ նրանք ահավոր վախեցել են (երբ ադրբեջանցիներն ավտոբուս են ներխուժել- խմբ.)»,- MediaHub-ի հետ զրույցում ասաց Սերգեյի մայրը՝ Սերինե Ամիրջանյանը։

Տիկին Սերինեն պատմում է, որ երեխային երեկ դիմավորելուց հետո հարցեր չի տվել, միայն այսօր է զրուցել նրա հետ, փորձել հասկանալ՝ ինչպես է զգում իրեն, բայց ամենից շատ կարոտն է խանգարել, որովհետև ավելի քան մեկ ամիս ընտանիքից կտրված է եղել։

Մայրը պատմում է, որ Սերգեյի սթրեսը կրկնակի է եղել, քանի որ բլոկադայի ընթացքում պապիկն է մահացել ու, բնականաբար, թոռը չի կարողացել մասնակցել նրա հուղարկավորությանը։

«Մենք չէինք ուզում այդ լուրն ասել իրեն, ընկերներն են տեղեկացրել, զանգել ցավակցել են, այդպես է իմացել պապիկի մահվան մասին»,-ասաց Սերինե Ամիրջանյանը։ Նրա խոսքով՝ երեխաների համար ամենասթրեսային իրավիճակը երեկվա ճանապարհի միջադեպն է եղել, երբ Շուշի-Քարին տակ հատվածում երեխաներին տեղափոխող մեքենային են մոտեցել քաղաքացիական հագուստով, դեմքները փակած 10-15 ադրբեջանցիներ, նրանցից ոմանք ներխուժել են մեքենա և նկարահանել մեքենայում գտնվող երեխաներին։

«Տղաս պատմում է, որ ներխուժել են մեքենա, աղջիկները շատ են վախեցել, բայց ինչ հարց տալիս եմ, ասում է՝ ամեն ինչ լավ է»,-նշեց Սերինե Ամիրջանյանը։

Նշում է, որ հնարավորություն կար որդուն թողնել Երևանում, որ շարունակեր այնտեղ ապրել, բայց հրաժարվել է՝ ասելով, որ որտեղ իր ընկերները, այնտեղ էլ ինքը։ Տիկին Սերինեն շնորհակալություն է հայտնում Գորիսի հյուրանոցի անձնակազմին և ուսուցիչներին, քանի որ ամբողջ ընթացքում երեխաների հետ անչափ հոգատար են եղել, կարողացել են ծանր իրավիճակը գոնե մի քիչ մեղմել, իսկ շրջափակման մեջ դեռևս ապրելու մասին ասում է.

«Բնականաբար, լարվածությունը մեծ է, բայց մենք պատրաստ ենք և դիմադրում ենք, որովհետև մենք մեր հողի վրա ենք, մեր տանը»,-խոսքն ամփոփեց Սերինե Ամիրջանյանը։

Հիշեցնենք, որ արդեն 38 օր է Ադրբեջանը ապօրինի կերպով փակել է Լաչինի միջանցքը, որն Արցախն արտաքին աշխարհին կապող միակ ճանապարհն է։ Ադրբեջանական կողմի գործողությունների հետևանքով Արցախի 120 000 բնակչությունը, որից 30 000-ը երեխաներ են, հայտնվել է հումանիտար ճգնաժամի մեջ:

Շուշանիկ Միսկարյան