Բագրատ Սրբազանը այսօր հանդիպում ունեցավ արցախցի մի խումբ պատգամավորների, կառավարության անդամների ու քաղաքացիների հետ: MediaHub-ը այս առիթով կապ հաստատեց Արցախի ԱԺ «Արդարություն» խմբակցության պատգամավոր Մետաքսե Հակոբյանի հետ, որը ևս ներկա էր հանդիպմանը։ Ինչպե՞ս է այն անցել, ի՞նչ հարցեր են քննարկվել.
«Կարծում եմ, որ դրանք անսպասելի քննարկումներ չէին կարող լինել, բոլորիս մտահոգող հարցերն էին։ Բոլորիս մտահոգած խնդիրը հիմնականում Արցախի խնդիրն էր և արցախցիների իրավունքների պաշտպանված լինելը միջազգային հարթակներում և, իհարկե, վերադարձ դեպի Արցախ»,- ասաց արցախցի պատգամավորը։
Նրա խոսքով. Բագրատ Սրբազանի հետ ունեցած քննարկումերը շատ արդյունավետ էին, քանի որ իրենք բոլորը ամեն ինչին նայում են նույն ուղղությամբ. «Ազգային շահն սպասարկող, ազգային մտածողության դիտարկումներ էին դրանք»,- ընդգծեց նա։
Հակոբյանի խոսքով՝ դահլիճը լեփ-լեցուն է եղել ԱԺ պատգամավորներով, ինչպես նախկին, այնպես էլ ներկա, սակայն Արցախի նախագահ Սամվել Շահրամանյանը ներկա չի եղել հանդիպմանը։
“Մենք բոլորս ենք գիտակցում այս հանդիպման կարևորությունը և չմասնակցելը, մեղմ ասած, ճիշտ չէ»,- ասաց նա։
Մեր հարցին, թե ԱՀ նահագահը միացե՞լ է Սրբազան պայքարին, պատգամավորը պատասխանեց հետևյալը.
“Ես կարծում եմ ՝ անձերով չէ, որ պետք է պայմանավորեք ու առանձին չենք էլ դիտարկում. այս պայքարը արցախցու, սյունեցու ու տավուշեցու պայքար չէ, սա հայի պայքարն է և պարոն Շահրամանյանը չեմ կարծում, որ ուրիշ կերպ է մտածում, քան մենք»։
Մետաքսե Հակոբյանը հավատում է, որ այս պայքարը հաջողության կհասնի․
«Օրեր շարունակ` ի դեմս այս իշխանությունների, պարզվում է այն հանգամանքը, որ Հայաստանում ավելի մեծ մաս են կազմում ազգային մտածողությամբ մարդիկ»։
Անդրադառնալով Կիրանցում վերջին զարգացումներին ու այն հեռանկարներին, որոնք բացում է իշխանությունների ու Ադրբեջանի պայմանավորվածությամբ տեղի ունեցող սահմանազատման գործընթացը, Մետաքսե Հակոբյանը համաձայնեց՝ զուգահեռներ Արցախի շրջափակման հետ հնարավոր չէ չտանել.
“Ես փորձում եմ համեմատականներ չտանել Արցախի հետ, բայց, ցավոք, կրկնվում է նույն ճակատագիրը։ Իհարկե, սցենարը նույնն է, և մենք կարող ենք նույնիսկ տեղայնացնել, Կիրանցը համեմատել Արցախի Մարտունու շրջանի Թաղավարդ գյուղի հետ, որի կեսը հանձնվել էր թշնամուն և հանձնված մասում էր հենց գերեզմանատունը, որտեղ մայրերը 2020 թվականին իրենց որդիներին էին հուղարկավորել, իսկ մյուս կեսում ապրում էին թաղավարդցիները։ Նույնիսկ դպրոցը մի քանի կիլոմետր հեռավորության վրա էր գտնվում, ինչպես Կիրանցում”,- ասաց նա՝ հավելելով, որ դպրոցի մոտակայքում կային խիտ ծառեր, ինչը, սակայն, չպաշտպանեց թաղավարդցիներին։
Հիշենցնեք, որ Նիկոլ Փաշինյանը հայտատրել էր, որ եթե չեն ուզում տեսնել թշնամուն՝ թող ծառ տնկեն։
«Փուչիկներ է, որ ուղղակի փչում է այս իշխանությունը: Եթե մենք չկարողանանք կանգնեցնել սահմանազատման գործընթացը, դա Կիրանցով չի ավարտվելու, թիրախում է Սյունիքը, Ջերմուկը, Գեղարքունիքը, Երևանը, որը հաճախ է հնչում թշնամու շուրթերից, մինչդեռ մենք չենք տեսնում այս իշխանությունից հակառակվող որևէ բան»,- շեշտեց մեր զրուցակիցը:
Պատգամավորը խնդիրը լուծելու համար միակ արգելք է տեսնում իշխանությանը, որոնք թշնամու շահերն են պաշտպանում, և նշում՝ պետք է ուղղակի հեռացնել նրանց, բերելով իշխանության ազգային մտածողությամբ մարդկանց։
Վիկա Աբգարյան