ՌԴ-ից կրկին Երևան-Բաքու բանակցություններ անցկացնելու առաջարկություններ են հնչում ու պնդում, որ Բաքուն համաձայն է, Երևանը՝ ոչ։ Այս պնդմանն այսօր ԱԺ-ում ճեպազրույցների ժամանակ արձագանքեց «Քաղաքացիական պայմանագիր» խմբակցության պատգամավոր Սարգիս Խանդանյանը։
Վերջինս նշեց, որ բանակցությունների որոշակի տրամաբանություն կա․ «Սա է պատճառը, որ Հայաստանը նշում է՝ կա արդյունավետության հարց։ Վաշինգտոնում մի քանի օր առաջ արտգործնախարարների մակարդակով բանակցություններ են եղել: Եվ Բրյուսելում էլ երկրի ղեկավարների մակարդակով է բանակցություններ եղել, որտեղ համաձայնեցվել են սկզբունքային հարցերը ակնկալվելիք խաղաղության պայմանագրի շուրջ։
«Շատ կարևոր է, որ այս գործընթացը շարունակվի և բանակցությունները չվերադառնան 0-ական կետի ու նորից սկսեն սկզբունքային հարցերի շուրջ քննարկումներ տեղի ունենալ։ Հայկական կողմը միշտ պատրաստ է բանակցությունների և ցավոք, վերջին ամիսներին Ադրբեջանն է խուսափում բանակցություններից»,- ասաց Խանդանյանը։
Խոսելով մոսկովյան հարթակի մասին՝ պատգամավորը նշեց, որ որքան էլ նոյեմբերի 9-ի փաստաթղթի երաշխավորող կողմը ՌԴ-ն է, «ցավոք, հիմա այնպիսի իրավիճակ է, որ հիմնական կետերը չեն պահպանվել»։
Մանրամասները՝ տեսանյութում