Եվրամիությունը դաշինքի պաշտպանության նախարարներին կոչ է արել համակարգել զենքի գնումները՝ մատակարարներից ավելի շահավետ պայմաններ ստանալու համար, քանի որ ԵՄ անդամները ձգտում են համալրել Ուկրաինային մատակարարումների պատճառով սպառված պաշարները, հայտնում է Reuters-ը։

Արեւմտյան երկրները շտապում են համալրել զենքի եւ զինամթերքի պաշարները այն բանից հետո, երբ զենքի հսկայական խմբաքանակներ են առաքվել Կիեւ, ինչը արդյունաբերությունից պահանջում է հզորությունների ավելացում՝ աճող պահանջարկը բավարարելու համար:

«Անհրաժեշտ է շտապ վերականգնել մեր եվրոպական զինված ուժերի մարտունակությունը եւ համալրել սպառված պաշարները»,- ասել է ԵՄ դիվանագիտական ծառայության անվտանգության եւ պաշտպանության բաժնի ղեկավար Սթեյն Մոլսը:

ԵՄ պաշտպանության նախարարների հաջորդ հանդիպումը տեղի կունենա նոյեմբերի 15-ին, եւ Մոլսը հույս է հայտնել, որ նրանք կոնկրետ առաջարկներ կներկայացնեն զենքի համակարգված գնման համար։

Մոլսի խոսքով՝ եվրոպական երկրներին անհրաժեշտ են հակաօդային եւ հակահրթիռային պաշտպանություն, հակատանկային եւ հրետանային համակարգեր եւ անօդաչու սարքեր։ Բրյուսելը հույս ունի, որ 5-7 «նշանակալի նախագծեր» կլինեն՝ անդամ երկրների կողմից գնումները այնպիսի ոլորտներում համակարգելու համար, ինչպիսին է զինամթերքը:

ԵՄ-ում պաշտպանական գնումները հազվադեպ են իրականացվում համատեղ, քանի որ երկրները ձգտում են աջակցել հայրենական արդյունաբերությանը: «Այժմ մենք բոլորս իսկապես հնարավորություն ունենք մի կողմ դնելու այս վաղեմի…ազգային շահերը»,- ասել է Մոլսը:

Եվրոպական հանձնաժողովի պաշտպանության, արդյունաբերության եւ տիեզերքի հարցերով գլխավոր տնօրինության ղեկավար Տիմո Պեսոնենն ասել է, որ ԵՄ երկրները չափազանց երկար են անտեսել պաշտպանական ներդրումները: Այն դեպքում, երբ ԵՄ ներդրումները 20 տարում աճել են 22 տոկոսով, ԱՄՆ-ում դրանք աճել են 66 տոկոսով, Ռուսաստանում՝ մոտ 300 տոկոսով եւ Չինաստանում ավելի քան 600 տոկոսով, ասել է նա։