Լրագրող Քսենյա Սոբչակի կոմերցիոն տնօրեն Կիրիլ Սուխանովը մասամբ ընդունել է իր մեղքը և ասել, որ պատրաստ է հրապարակավ ներողություն խնդրել «Ռոստեկ»-ի ղեկավար Սերգեյ Չեմեզովից, գրում է RT-ն:
Շորթման մեջ մեղադրվող Սուխանովը խոստովանել է, որ ստացել է 800 հազար ռուբլի (բայց չի նշել, թե ինչի համար), սակայն պնդում է, որ «Ռոստեկ»-ի ղեկավարից 11 միլիոն չի շորթել։
Նրան սպառնում է մինչև 15 տարվա ազատազրկում։
Ավելի վաղ հայտնել էինք, որ ռուսաստանցի հեռուստաաստղ Քսենյա Սոբչակի մերձմոսկովյան առանձնատանը ոստիկանությունը խուզարկություն էր իրականացրել։
Աղբյուրի համաձայն՝ իրավապահների գործողությունները տեղի են ունենում Սոբչակի կոմերցիոն տնօրեն Կիրիլ Սուխանովի դեմ շորթման հոդվածով հարուցված քրեական գործի շրջանակում։ Ինքը հեռուստաաստղը այդ գործով որևէ կարգավիճակ չունի։
Սուխանովը ձերբակալվել է երեկ, Սոբչակը նրա ձերբակալությունը գնահատել է որպես երկրում լրագրության հերթական ճնշում։
«Ինձ կպչելու առիթ չունեն, և դա վրդովեցնում է նրանց։ Անընդհատ ձերբակալում են իմ լրագրողներին, այժմ էլ Կիրիլի հետևից են ընկել և գործ են կարում նրա վրա», - արձագանքել է հեռուստաաստղը։
Քսենյա Սոբչակը ղեկավարում է «Осторожно, Media» հոլդինգը, որը ներառում է տելեգրամյան լրատվական ալիքների ցանց, փոդքասթ ստուդիա և յութուբյան ալիքներ։ Նա Ռուսաստանի նախագահ Վլադիմիր Պուտինի քաղաքական կնքահայրը համարվող Անատոլի Սոբչակի դուստրն է, վերջին շրջանում հանդես է գալիս ընդդիմադիր դիրքերից: