Նիդեռլանդները 3-0 հաղթեց Ռումինիային և անցավ 1/4 եզրափակիչ․ մրցակիցը կլինի Ավստրիա ​​​​​​- Թուրքիա զույգի հաղթողը

Հանդիպման հաշիվը 20'-ին բացեց Հոլանդիան։ «Լայփցիգի» հարձակվող Խավի Սիմոնսի փոխանցումից հետո Կոդի Գակպոն ռումինացիների տուգանային հրապարակից գրավեց դարպասի մոտակա անկյունը։ Սա «Լիվերփուլի» հարձակվողի 3-րդ գոլն էր «Եվրո2024»-ում։ Այս ցուցանիշով նա հավասարվեց Վրաստանի և Գերմանիայի հարձակվողներ Գեորգի Միկաուտաձեին ու Ջամալ Մուսիալային, որոնք գլխավորում են ռմբարկուների ցուցակը։

83-րդ րոպեին արդեն Գակպոն դարձավ գոլային փոխանցման հեղինակ։ Նրան հաջողվեց հարձակվող Մեմֆիս Դեպայի փոխանցումից հետո գնդակը պահել խաղադաշտում և այն ուղարկել Դորտմունդի «Բորուսիայի» հարձակվող, փոխարինման մտած Դոնյելլ Մալենին, որն էլ դարձավ Նիդեռլանդների 2-րդ գոլի հեղինակը։

90+3'-ին Դոնյելլ Մալենը դուբլ ձևակերպեց, իսկ Խավի Սիմոնսը՝ գոլային փոխանցման դուբլ։ Սիմոնսի փոխանցումից հետո հակագրոհի ելնելով՝ Մալենը սեփական կիսադաշտից գնդակը հասցրեց ռումինացիների դարպասի մոտ ու դրեց խաղի վերջակետը։

Կոդի Գակպոն ճանաչվեց հանդիպման խաղացող։

Բաժանորդագրվեք տելեգրամյան ալիքին MediaHub