Ռուսաստանը անցանկալի անձ է հայտարարել ԵՄ պատվիրակության 18 աշխատակցի
Ռուսաստանը, ի պատասխան Եվրամիությունում մշտական ներկայացուցչությունից իր աշխատակիցների վտարման, պերսոնա նոն գրատա է հայտարարել Մոսկվայում ԵՄ պատվիրակության 18 աշխատակցի. հայտնել է Ռուսաստանի Դաշնության արտաքին գործերի նախարարությունը։
«Ի պատասխան Եվրամիության ոչ բարեկամական գործողությունների՝ Ռուսաստանում ԵՄ պատվիրակության 18 աշխատակիցներ հայտարարվել են պերսոնա նոն գրատա և մոտ ապագայում պետք է լքեն Ռուսաստանի Դաշնության տարածքը։ Համապատասխան նոտան փոխանցվել է Մոսկվայում ԵՄ պատվիրակության ղեկավար Մարկուս Էդերերին»,- հայտնել են դիվանագիտական գերատեսչությունից։
Ապրիլի 5-ին Եվրամիությունը պերսոնա նոն գրատա է հայտարարել ԵՄ-ում Ռուսաստանի մշտական ներկայացուցչության 19 աշխատակցի «իրենց դիվանագիտական կարգավիճակին հակասող գործողություններին մասնակցելու համար»։
ԵՄ-ում Ռուսաստանի Դաշնության առաքելությունը տեղի ունեցածը անվանել էր թշնամական և անհիմն քայլ։ Նշվել էր, որ սրան պատասխան արձագանք է տրվելու։
Ռուսաստանի Դաշնության նախագահի մամուլի քարտուղար Դմիտրի Պեսկովն իր հերթին նշել է, որ Կրեմլը բացասաբար է վերաբերվում ԵՄ երկրների կողմից ռուս դիվանագետների արտաքսմանը։ Այդ քայլերը բարդացնում են երկրների միջև շփումները և անխուսափելիորեն կհանգեցնեն ռուսական պատասխան գործողությունների:
