44-օրյա պատերազմից հետո գերեվարված եւ անհետ կորած զինծառայողների երկու տասնյակից ավելի ծնողներ երեկ Նիկոլ Փաշինյանի հետ հանդիպումից դուրս են եկել հույսով, որ իրենց որդիների հարցը բարձրացվելու է Ալիեւ-Փաշինյան բրյուսելյան հանդիպման ժամանակ։ Համենայնդեպս, Փաշինյանն այդպիսի խոստում է տվել։
«Մենք խնդրել ու պահանջել ենք, որ մեր էրեխեքի հարցին լուծում տրվի։ Մեր էրեխեքի մասին մոռացել են, մենք պիտի ամեն անգամ հիշեցնենք իրենց, որ ողջ են ու պիտի վերադառնան»,-MediaHub-ին պատմեց հանդիպմանը մասնակցած ծնողներից մեկը։
Ադրբեջանում պահվող 39 գերու մասին հայտարարած Փաշինյանը ծնողների հետ հանդիպման ժամանակ չի հերքել, որ նրանց որդիներն էլ կարող են գերեվարված լինել։
«Իրենք հայտարարում են, որ 39 հոգուց ավելի մենք գերի չունենք, որովհետեւ այդքան զինվոր հանրության աչքի առաջ են գերեվարվել։ Մեր տղերքի մասին ոչ մի տեղեկություն չունեն։ 280 հոգի անհայտ կորած են, այդքան ծնող պահանջում է՝ գտնել իրենց որդիներին»,-պատմեց մեր զրուցակիցը։
Անհետ կորածների եւ գերիների ծնողները սեփական հետաքննությունն են իրականացրել, ու որոշները պարզել են, որ իրենց որդիները ողջ են։
«Որ րոպեին ասեն՝ իմ էրեխեն գտնվում ա Ադրբեջանում, ես կգնամ կհասնեմ Բաքու։ Փաշինյանը մոզ խոստացել է, որ հանդիպման ժամանակ բարձրացնելու է գերիների հարցը»,- ասաց մեր զրուցակիցը։
Ամբողջ խնդիրը նրանում է, որ պաշտոնական մակարդակով խոսվում է 39 գերու մասին, որոնց մեջ չեն մտնում Փաշինյանի հետ հանդիպած ծնողների որդիները, որոնք եւս անհետացել են 44-օրյա պատերազմի ընթացքում։
Ըստ էության, Հայաստանի վարչապետը ծնողների հետ հանդիպման ժամանակ կա՛մ սին խոստումներ է տվել՝ նրանց լռեցնելու համար, ովքեր հանդիպում ունենալուց առաջ գիշերել էին կառավարական ամառանոցի դիմաց, կա՛մ էլ իսկապես տեղյակ է, որ գերիների թիվը շատ ավելի մեծ է ու լռում է՝ իր իշխանության անսասանությունը չխաթարելու համար։
Նշենք, որ այսօր հրավիրված ասուլիսի ժամանակ Համեմատական իրավունքի կենտրոնի ղեկավար, ՄԻԵԴ-ում հայ գերիների շահերի ներկայացուցիչ, փաստաբան Սիրանուշ Սահակյանը հայտարարեց, որ 33-ը պաշտոնականացված թիվն է, իսկ իրենք խոսել եւ շարունակում են խոսել հավելյալ 80 դեպքի մասին: