Խարդախներն ավելի քան 300 հազար դոլար են հափշտակել ռուս դիվանագետից․ մանրամասներ

Խարդախները Մալթայում Ռուսաստանի նախկին դեսպան Վլադիմիր Մալիգինից հափշտալել են գրեթե 30 միլիոն ռուբլի (ավելի քան 300 հազար դոլար)։ Այս մասին գրել է  Baza տելեգրամյան ալիքը։

Ռուս դիվանագետը մարտի 13-ին զանգ է ստացել «բանկային վերահսկողության ընթացիկ ծառայության մենեջերից»։ Նա խնդրել է Մալիգինին մանրամասն պատմել իր բանկային հաշիվների մասին ու տեղադրել հատուկ հավելված։ Հաջորդ օրը խաբեբան կրկին զանգահարել է նախկին դեսպանին ու խնդրել բանկային հաշվից գումար հանել ու փոխանցել «ապահով հաշվին»։ Մալիգինը կատարել է խնդրանքն ու կորցրել առաջին երկու միլիոն ռուբլին: Մեկ այլ օր անց նա գումար է հանել մեկ այլ բանկի մեկ այլ հաշվից:

Ավելի ուշ խաբեբաները դիվանագետին խնդրել են իր SIM քարտը տեղադրել կնոջ հեռախոսի մեջ։ Այս գործողության արդյունքում գումար է դուրս գրվել նաև Մալիգինի կնոջ հաշվից, ինչը դիվանագետի ընտանիքին արժեցել է ևս չորս միլիոն ռուբլի: Քիչ անց խաբեբաները խնդրել են Մալիգինին կանխիկ գումար տալ՝ գումարը պետք է դրվեր տոպրակի մեջ ու հանձնվեր հատուկ աշխատակցի։ Դիվանագետն այսպիսով հանձնել է 165 հազար դոլար և 25 հազար եվրո՝ ընդհանուր առմամբ ավելի քան 17 միլիոն ռուբլի։

Դիվանագետի հաշիվներից վերջին դեբետները կատարվել են մարտի 19-ին. հաշվից անհետացել է չորս միլիոն ռուբլի: Սրանից հետո 73-ամյա Մալիգինը դիմել է ոստիկանություն։