Դատարանում «Սիլ պլազան» հանդես է գալիս որպես 3-րդ կողմ։ Կարծում եմ՝ այս դատաքննությամբ կպարզվի իրականությունը և վերջ կդրվի բոլոր շահարկումներին։ Այս մասին այսօր MediaHub.am-ի հետ զրույցում ասաց Խաչատուր Սուքիասյանի խոսնակ Աննա Մկրտչյանը՝ մեկնաբանելով Դատախազության՝ քրեական գործ հարուցելու և Սուքիասյաններին «Սիլ պլազայի» սեփականության իրավունքից զրկելու հարցը։ 

Հնարավո՞ր է, որ շենքը վերադարձվի պետությանը կամ, առհասարակ, Պետական գույքի կոմիտեն առնչություն ունի՞ գործի հետ. MediaHub.am-ին ՊԳԿԿ հանրային կապերի պատասխանատու Գեղամ Ասատրյանը փոխանցեց, որ այս պահին որևէ մեկնաբանություն չունեն։

«Իրավական գործընթաց է, հարցը մեր տիրույթում չէ։ Իրավական գործընթացի արդյունքում որոշում կկայացվի, եթե մեզ առնչվող որևէ հարց լինի՝ կոմիտեն կկատարի այդ որոշումը։ Կրկնում եմ՝ Պետական գույքի կոմիտեն այս պահին որևէ կապ չունի տեղի ունեցողի հետ»,-ասաց նա։

Հիշեցնենք, որ Ալբերտ Սուքիասյանը շենքը սեփականաշնորհել է այն ժամանակ, երբ Երևանի քաղաքապետը ներկայիս նախագահ Վահագն Խաչատուրյանն էր և հնարավոր է, որ շենքը պատկանել է համայնքին։ MediaHub.am-ին ՀՀ գլխավոր դատախազի խորհրդական Լուսինե Մարտիրոսյանը փոխանցեց, որ «Հետք»-ի «$ 5655. սեփականաշնորհում «ջրի գնով»» վերտառությամբ հրապարակման առնչությամբ ՀՀ գլխավոր դատախազության պետական շահերի պաշտպանության վարչությունում նախաձեռնված ուսումնասիրության արդյունքում 18.10.2022 թվականին հայց է հարուցվել ՀՀ վարչական դատարան՝ Երքաղխորհրդի գործկոմի և «Աստղիկ-1» կոպերատիվի միջև Երևան քաղաքի Արամի փող. 3 և 5 հասցեների անշարժ գույքի օտարման իրավահարաբերության բացակայությունը ճանաչելու և որպես հետևանք իրավունքի պետական գրանցումները և սեղանամատյանի գրառումներն անվավեր ճանաչելու պահանջներով:

«ՀՀ վարչական դատարանի /դատավոր Անի Հարությունյան/ 28.10.2022 թվականի որոշմամբ հայցադիմումն ընդունվել է վարույթ: Նույն օրվա մեկ այլ որոշմամբ բավարարվել է հայցի ապահովում կիրառելու մասին հայցվոր ՀՀ գլխավոր դատախազության միջնորդությունը՝ ՀՀ կադաստրի կոմիտեին վիճելի հասցեների անշարժ գույքերի նկատմամբ իրավունքի պետական գրանցում կատարելու վերաբերյալ: ԴԱՀԿ ծառայության Երևան քաղաքի Կենտրոն, Նորք-Մարաշ, Էրեբունի-Նուբարաշեն վարչական շրջանների բաժնի ավագ հարկադիր կատարողը 28.10.2022 թվականին որոշում է կայացրել, որով արգելել է ՀՀ կադաստրի կոմիտեին Երևան քաղաքի Արամի 3 և 5 հասցեների անշարժ գույքերի նկատմամբ իրավունքի պետական գրանցում կատարելը: Նույն ուսումնասիրության արդյունքներով հարուցվել է նաև քրեական գործ»,-ասաց նա։ 

Լիաննա Թորոսյան