Այս իշխանություններն ապացուցել են, որ մշտապես պայմանավորվածություններ են ձեռք բերում ժողովրդի թիկունքում, բայց չեմ կարծում, որ վաղը որևէ փաստաթուղթ կստորագրվի։ Այդ մասին MediaHub.am-ի հետ զրույցում ասաց ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը։
Նրա խոսքով՝ հավանական է, որ վաղը ստորագրվելիք փաստաթղթի կետերի մասին կխոսեն։
«Սպասենք և տեսնենք՝ ինչ է լինելու։ Ամեն դեպքում, այսօրվա հանրահավաքը հենց դրա մասին է, որ Նիկոլ Փաշինյանը չի կարող հանդես գալ հայ ժողովրդի, Արցախի ու Հայաստանի անունից, և այսօր հավաքված մարդկանց քանակը դրա մասին է խոսում»,- նշեց Արթուր Վանեցյանը։
Հարցին, թե ի՞նչ է անելու ընդդիմությունը, որ քաղաքացիները ևս մեկ անգամ չհիասթափվեն ու չմտածեն, որ ընդդիմությունը մարդկանց հավաքում, ապա ուղարկում է տուն, Արթուր Վանեցյանն արձագանքեց՝ ասելով, որ պետք է հասկանալ՝ ՀՀ-ի և Արցախի քաղաքացիները պետք է որոշեն իրենց ապագան։
«Քաղաքացին ինքը պետք է որոշի՝ պատրա՞ստ է Արցախից հրաժարվելուն, պատրա՞ստ է նոր զիջումների։ Եթե ժողովուրդը կամք ցուցաբերեց, դուրս եկավ փողոց և իր վճռական խոսքն ասաց, ընդդիմությունը լինելու է այն ուժը, որ կհամակարգի բոլոր գործողությունները»,- նշեց նա։
Արթուր Վանեցյանի դիտարկմամբ՝ ընդդիմությունը պատրաստ է անել այն, ինչ իրենից ակնկալում է ժողովուրդը։
«Ժողովրդից խնդրում ենք մի բան՝ անջատել հեռախոսի ուղիղ եթերները և դուրս գալ փողոց, գալ ու այստեղ կանգնել»,- ասաց նա։
Այլ գործողություններ կլինեն, թե ոչ, ըստ Արթուր Վանեցյանի՝ ժամանակը ցույց կտա։
«Ես մշտապես ասել եմ, որ ընդդիմությունն անթերի չէ, բայց այս ընդդիմության միակ դադարը եղել է պատերազմի ընթացքում, այսինքն՝ այդ ժամանակ մենք հանդես եկանք միասնական ճակատով»,- ասաց նա։ Արթուր Վանեցյանը շեշտեց՝ թույլ չեն տալու իշխանություններին գնալ նոր զիջումների։